Serbiya Oʻzbekiston fuqarolari uchun mehnat bozorini ochmoqda
Serbiya Oʻzbekiston bilan mehnat mobilligi boʻyicha birinchi bitimni imzoladi, u oʻzbekistonlik ishchilarga mahalliy xodimlar bilan teng huquqlarni taqdim etadi.
Serbiya mehnat mobilligi va mehnat migratsiyasi toʻgʻrisidagi yangi kelishuv doirasida Oʻzbekiston fuqarolari uchun mehnat bozorini ochishni rejalashtirmoqda.
Serbiya mehnat, bandlik, faxriylar va ijtimoiy masalalar vaziri Militsa Jurjevich Stamenkovski ushbu hujjatni tarixiy deb atadi va uning ikki tomonlama aloqalarni mustahkamlashdagi ahamiyatini taʼkidladi.
Vazirning soʻzlariga koʻra, bu Serbiya xorijiy davlat bilan imzolagan ilk bunday kelishuvdir. U buni Belgradning Oʻzbekiston bilan strategik hamkorlikni yoʻlga qoʻyishga boʻlgan intilishining tasdigʻi deb baholadi.
Stamenkovski kelishuvda Serbiyada ishlaydigan Oʻzbekiston fuqarolari uchun tizimli kafolatlar koʻzda tutilganini qayd etdi. Xususan, oʻzbekistonlik mutaxassislar serbiyalik ishchilar bilan bir xil huquqlarga ega boʻladilar.
Yaqin yillarda «Expo» koʻrgazmasi oʻtkazilishi munosabati bilan mamlakatda ishchi kuchiga qoʻshimcha ehtiyoj paydo boʻlishi kutilmoqda. Vazir Serbiyaga mehnatsevar, malakali va vijdonli mutaxassislar, jumladan, Oʻzbekistondan ham kerak boʻlishini maʼlum qildi.
Shu bilan birga, mamlakatlar kelishuvlarni amaliy joriy etishga oʻtmoqda. Oʻzbekiston Migratsiya agentligi qoʻshimcha xodimlarga muhtoj boʻlgan Serbiya kompaniyalari bilan toʻgʻridan-toʻgʻri muzokaralar olib bormoqda.
Ushbu ishlarni tezlashtirish uchun maxsus ishchi guruh tuzildi.
Stamenkovski, shuningdek, Serbiyada eng kam ish haqining kutilayotgan oʻzgarishlari haqida maʼlum qildi. Uning soʻzlariga koʻra, 2027 yil boshidan u 600 yevroni tashkil etishi, yil oxiriga kelib esa 650 yevrogacha koʻtarilishi kerak.
Serbiyalik vazir imzolangan kelishuvning oʻz mamlakati uchun noyobligini alohida taʼkidladi. Uning soʻzlariga koʻra, Oʻzbekiston Serbiya bunday turdagi shartnoma imzolagan birinchi va yagona davlat boʻlib qolmoqda.
Serbiyada boʻlib turgan Oʻzbekiston fuqarolari haqida gapirar ekan, Stamenkovski qonun buzilishi holatlari qayd etilmaganini taʼkidladi.
U oʻzbekistonlik fuqarolar oʻzlari boʻlib turgan mamlakat qadriyatlarini hurmat qilishlarini, ikki davlat xalqlarini esa mehmondoʻstlik va oʻzaro hurmat birlashtirib turishini maʼlum qildi.