Senat suv hisobini yuritish va undan foydalanish qoidalarini buzganlik uchun javobgarlikni kuchaytirishni maʼqulladi
Senat suv hisobini yuritish va undan foydalanish qoidalarini buzganlik uchun javobgarlikni kuchaytirishni maʼqulladi
Oʻzbekiston Senati suvning davlat hisobini yuritish va suv xoʻjaligi obʼyektlaridan foydalanish qoidalarini buzganlik uchun javobgarlikni kuchaytiruvchi qonunni qoʻllab-quvvatladi. Shuningdek, hujjatda suvdan foydalanish shartnomalarini maxsus axborot tizimi orqali elektron shaklda avtomatlashtirilgan tarzda roʻyxatdan oʻtkazish koʻzda tutilgan.
Oʻzgartirishlar Maʼmuriy javobgarlik toʻgʻrisidagi kodeks va Suv kodeksiga kiritilmoqda. Xususan, suvning davlat hisobini yuritish, suv xoʻjaligi obʼyektlari va inshootlarini ekspluatatsiya qilish, shuningdek, oqova suvlarni oqizish tartibiga rioya etish uchun masʼul boʻlgan shaxslarning javobgarligi belgilanmoqda.
Suv xoʻjaligi obʼyektlari, inshootlari va kanalizatsiya tarmoqlaridan foydalanish qoidalariga alohida aniqlik kiritilmoqda. Suvdan foydalanish toʻgʻrisidagi shartnomalarni maxsus axborot tizimi orqali elektron shaklda avtomatik tarzda roʻyxatdan oʻtkazish taklif etilmoqda.
Bundan tashqari, qonun suv xoʻjaligi obʼyektlari va xizmatlari faoliyatini autsorsing hamda davlat-xususiy sheriklik asosida tashkil etish tartibini aniqlashtiradi. Bunday loyihalar ishtirokchilarini tanlab olish tender va tanlovlar orqali amalga oshiriladi.
Senatorlarning fikricha, oʻzgartirishlar suv resurslaridan yanada samarali foydalanish, qonunbuzarliklarning oldini olish va ularning muhofazasini kuchaytirishga xizmat qilishi kerak.
Avvalroq Chorvoq suv ombori sohilida Sea Breeze Uzbekistan turistik majmuasini qurish loyihasi atrof-muhitga taʼsirni baholashning ikkinchi bosqichidan oʻtgan edi. Uning yakunlariga koʻra, davlat ekologik ekspertizasining ijobiy xulosasi olingan.