Saudiya “Sharq—G‘arb” neft quvurini qayta ishga tushirdi

Saudiya “Sharq—G‘arb” neft quvurini yana ishga tushirdi

Saudiya Arabistoni dron hujumidan keyin “Sharq—G‘arb” neft quvurining faoliyati qayta tiklanganini bildirdi. Reuters manbalarga tayanib yozishicha, mamlakat 22-sentyabr kuni kechroq Qizil dengizdagi Yanbu portidan neft eksportini davom ettirishi mumkin.

Manbalardan ikkisining aytishicha, quvur hozircha past quvvatda ishlayapti. Saudiya Arabistonining davlat energetika kompaniyasi Saudi Aramco bu holat yuzasidan hali izoh bermagan.

12-sentyabr kuni dronlar hujumi sabab Saudiya Arabistoni “Sharq—G‘arb” neft quvurini to‘xtatishga majbur bo‘lgan edi. Shu bois qirollikning Yanbu portida xom neftni kemalarga yuklash to‘xtab qolgan.

Hujumlar quvurning Ar-Riyod va Madina hududlaridagi obyektlariga qilingan. Saudiya tomoni dronlar Iroq hududidan uchirilganini ma’lum qilgan, biroq hujum ortida kim turganini oshkor etmagan. Biroq AQSH prezidenti Donald Tramp Saudiya neft quvuriga uyushtirilgan hujumda Eronni ayblagan.

“Sharq—G‘arb” quvurining uzunligi qariyb 1200 kilometr bo‘lib, Saudiya neftini Hormuz bo‘g‘ozidan o‘tkazmasdan jahon bozoriga olib chiqishdagi asosiy muqobil yo‘l hisoblanadi.

Kemalar harakatini kuzatuvchi kompaniyalar va tahlilchilar hisob-kitobiga ko‘ra, so‘nggi oylarda quvur orqali kuniga 4–5 mln barrel neft tashilgan. Bu jahon neft ta’minotining taxminan 4–5 foiziga teng.

Hormuz bo‘g‘ozi AQSH va Isroilning Eronga zarbalari ortidan yuzaga kelgan mojaro sabab amalda yopilgan. Jahon neft va suyultirilgan tabiiy gaz savdosining qariyb beshdan bir qismi odatda shu yo‘nalish orqali o‘tadi. Shu sabab Saudiya so‘nggi oylarda neftni jahon bozoriga chiqarishda Qizil dengiz yo‘nalishiga ko‘proq tayanib kelayotgan edi.