Saudiya birinchi, Oʻzbekiston 88,8 ball: dunyoda raqamli taraqqiyot reytingi eʼlon qilindi
2026-yilgi AKT rivojlanish indeksida Saudiya Arabistoni dunyoda birinchi oʻrinni egalladi. Oʻzbekiston 88,8 ball toʻpladi, AQSH 97,9 ball bilan toʻqqizinchi oʻrinni boʻlishdi, Rossiya va Xitoy esa 94,4 balldan qayd etdi.
Saudiya birinchi, Oʻzbekiston 88,8 ball: dunyoda raqamli taraqqiyot reytingi eʼlon qilindi
Visual Capitalist xalqaro telekommunikatsiyalar ittifoqining 2026-yilgi ICT Development Index - IDI maʼlumotlari asosida 159 ta iqtisodiyotning raqamli rivojlanishini solishtirdi. Indeks mamlakatlarning «universal va mazmunli raqamli ulanish» sari qanchalik oldinga siljiganini baholaydi.
IDI 10 ta koʻrsatkichdan iborat. Unda internetga kirish va undan foydalanish, aloqa tarmoqlarining qamrovi, maʼlumotlar isteʼmoli hamda internet xizmatlarining aholi uchun narxi kabi omillar inobatga olinadi.
Reytingda eng yuqori natija Saudiya Arabistonida qayd etilgan — 99,8 ball. Mamlakat universal ulanish boʻyicha 100 ball, mazmunli ulanish boʻyicha esa 99,6 ball olgan.
Eng yuqori oʻnta natijaning beshtasi Yaqin Sharq iqtisodiyotlariga toʻgʻri keladi. Saudiya Arabistonidan tashqari BAA, Kuvayt, Qatar va Bahrayn ham yuqori oʻrinlarni egallagan.
Yevropada Estoniya 98,5 ball bilan eng yuqori koʻrsatkichga ega. Finlandiya 98,4 ball bilan undan keyingi oʻrinda turibdi. Daniyaning natijasi 98,2 ballni tashkil etgan.
Amerika qitʼasida AQSH 97,9 ball bilan yetakchi. Hongkong va Singapur ham 97,9 balldan toʻplagan, Janubiy Koreya 95,5, Malayziya esa 95,3 ball qayd etgan.
Arab davlatlari mintaqasida mamlakatlar oʻrtasida katta tafovut bor. Mintaqaning oʻrtacha koʻrsatkichi 78 ball boʻlsa-da, ayrim iqtisodiyotlarda natija deyarli maksimal darajaga yaqin, boshqalarida esa 37 ballgacha tushadi. Bu internet tarmoqlarining mavjudligi, ulardan foydalanish darajasi va xizmatlar narxi qoʻshni davlatlarda ham keskin farq qilishi mumkinligini koʻrsatadi.
Osiyo-Tinch okeani mintaqasida eng yuqori va eng past natijalar orasidagi farq 62 ballga yetadi. Bu yerda urbanizatsiya darajasi, telekommunikatsiya infratuzilmasi va aholi daromadlari asosiy omillar hisoblanadi.
Osiyo raqamli infratuzilma, ayniqsa maʼlumotlarni qayta ishlash markazlari qurilishi boʻyicha ham jadal oʻsmoqda. Bulutli texnologiyalar va sunʼiy intellektdan foydalanish kengaygani Malayziya, Indoneziya va Tailand kabi davlatlarga yangi investitsiyalarni jalb qilmoqda.
Dunyo boʻyicha IDI'ning oʻrtacha koʻrsatkichi 79 ballni tashkil etadi. 59 ta iqtisodiyot 90–100 ball oraligʻida natija qayd etgan, 15 tasi esa 50 balldan kam toʻplagan.
Daromad darajasi raqamli rivojlanish bilan chambarchas bogʻliq boʻlib qolmoqda. Kam daromadli iqtisodiyotlarda oʻrtacha koʻrsatkich 42 ball, yuqori daromadli mamlakatlarda esa 93 ballga teng.