Samarqandda Bolalar farovonligi masalalari boʻyicha Butunjahon sammiti start olmoqda

Samarqandda Bolalar farovonligi masalalari boʻyicha Butunjahon sammiti boshlanmoqda

21—22 oktyabr kunlari Samarqandda Bolalar farovonligiga investitsiya kiritish boʻyicha Butunjahon sammiti (World Summit on Investing in Children’s Well-being) boʻlib oʻtadi. Unda 100 dan ortiq mamlakat vakillari ishtirok etishi kutilmoqda. Forumning asosiy vazifasi — bolalikni himoya qilish, salomatlik, taʼlim va oilalarni ijtimoiy qoʻllab-quvvatlash mavzularini xalqaro darajaga olib chiqishdan iborat.

Sammit Oʻzbekiston tashabbusi bilan YUNISEF, Jahon sogʻliqni saqlash tashkiloti, Jahon banki hamda BMT Bosh kotibining Bolalarga nisbatan zoʻravonlik masalalari boʻyicha Maxsus vakili bilan hamkorlikda oʻtkazilmoqda.

Dasturda yalpi majlis, uchta mavzuli panel sessiyasi, Bolalar onkologiyasi boʻyicha ikkinchi xalqaro kongress va bir qator turdosh tadbirlar rejalashtirilgan. Sammit yakunlari boʻyicha Samarqand deklaratsiyasi qabul qilinishi kutilmoqda.

Alohida urgʻu Oʻzbekistondagi islohotlarga beriladi. Taqdim etilgan materiallarga koʻra, mamlakatda ijtimoiy xizmat turlari soni 26 tadan 140 tagacha oshdi, bolalar kambagʻalligi darajasi 21,5% dan 5,4% gacha kamaydi, maktabgacha taʼlim qamrovi esa 27,7% dan 78% gacha ortdi.

Bugungi kunda mamlakatda 208 ta «Inson» ijtimoiy xizmatlar markazi faoliyat yuritmoqda, oilalar ehtiyojlarini esa deyarli 9 ming nafar ijtimoiy xodim baholaydi va hamrohlik qiladi. Bunday mexanizm muammolarni erta aniqlash hamda bolalar va oilalarga manzilli yordam koʻrsatishga qaratilgan.

Sammit doirasida onalik va bolalikni muhofaza qilish, taʼlim, reabilitatsiya, inklyuziya va bolalar huquqlarini himoya qilish sohasidagi islohotlarga bagʻishlangan «Dunyo bolalar nigohida» koʻrgazmasi ham boʻlib oʻtmoqda. Alohida ekspozitsiyalar onkologik kasalliklarga chalingan bolalarni qoʻllab-quvvatlash va palliativ yordam tizimini rivojlantirishga bagʻishlangan.

Taqdim etilgan maʼlumotlarga koʻra, Oʻzbekistonda bolada onkologik kasallik gumon qilingan paytdan boshlab davolanish boshlanguniga qadar boʻlgan muddat 130–160 kundan 10–18 kungacha qisqardi. Onkologik kasalliklarga chalingan bolalarning bir yillik yashovchanligi 37% dan 44,5% gacha oshdi.

Tashkilotchilarning taʼkidlashicha, islohotlar natijadorligining asosiy koʻrsatkichi har bir bolaning hayot sifati real darajada yaxshilanishi boʻlishi kerak. Sammit erta rivojlanish, zoʻravonlikdan himoya qilish, inklyuziv taʼlim, bolalar onkologik kasalliklarini davolash va oilalarni qoʻllab-quvvatlash masalalarida xalqaro tajriba almashish va hamkorlikni rivojlantirishga xizmat qilishi koʻzda tutilgan.