Samarqand SHHTning xavfsizlik boʻyicha birinchi ekspertlar muloqotiga mezbonlik qiladi
5–6 noyabr kunlari Samarqandda raqamli texnologiyalar asrida xavfsizlikka tahdidlarni muhokama qilish uchun 24 ta davlat va beshta xalqaro tuzilma vakillari yigʻiladi.
Samarqand SHHTning xavfsizlik boʻyicha birinchi ekspertlar muloqoti maydoniga aylanadi
2026 yil 5–6 noyabr kunlari Samarqandda xavfsizlik masalalari boʻyicha birinchi ekspertlar «SHHT plyus muloqoti» boʻlib oʻtadi. Uchrashuvda ishtirokchilar raqamli texnologiyalar va sunʼiy intellekt rivojlanishini hisobga olgan holda terrorizm va ekstremizmga qarshi kurashishni muhokama qiladilar.
Tadbir Oʻzbekiston Davlat xavfsizlik xizmati rahbari, general-polkovnik Baxtiyor Qurbonov raisligida oʻtkaziladi.
Uchrashuvda SHHTga aʼzo davlatlar, kuzatuvchi mamlakatlar va muloqot boʻyicha hamkorlarning maxsus xizmatlari, xalqaro tashkilotlar rahbarlari va vakillari, shuningdek, taklif etilgan mehmonlar ishtirok etadi. Jami 24 ta davlat va beshta xalqaro tuzilmadan 33 ta delegatsiya kelishi kutilmoqda.
Muhokamaning bosh mavzusi «Raqamli transformatsiya davrida xavfsizlik: yangi texnologiyalar rivojlanishini hisobga olgan holda terrorizm va ekstremizmga qarshi kurashish» boʻladi. Ishtirokchilar ilgʻor texnologiyalar va sunʼiy intellekt zamonaviy xavf-xatarlar hamda xavfsizlikka tahdidlar xususiyatiga qanday taʼsir koʻrsatayotgani haqida fikr almashadilar.
Ekspertlik formatini tashkil etish tashabbusi Oʻzbekiston Prezidenti Shavkat Mirziyoyevga tegishli. U ushbu taklifni ilk bor 2024 yilda Astanada boʻlib oʻtgan SHHT sammitida ilgari surgan edi.
2025 yilda Xitoyning Tyantszin shahrida boʻlib oʻtgan SHHTga aʼzo davlatlar rahbarlari kengashi majlisida birinchi uchrashuvni Samarqandda oʻtkazish taklif qilingan edi.
Muloqot yakunlari boʻyicha delegatsiyalar rahbarlari raqamli transformatsiya sharoitida xalqaro terrorizm va ekstremizmga qarshi kurashishda hamkorlikning aniq vazifalari va ustuvor yoʻnalishlarini belgilab olishni rejalashtirmoqdalar.