Ruminiya AES faoliyatini to‘xtatib qo‘ydi
**Ruminiya AES faoliyatini to‘xtatdi: Dunay daryosidagi suv sathi rekord darajada pasayishi oqibatlari**
Ruminiya Dunay daryosida suv sathi misli ko‘rilmagan darajada pasaygani sababli mamlakatdagi yagona “Chernavode” atom elektr stansiyasining so‘nggi ishlayotgan energiya blokini ham to‘xtatishga majbur bo‘ldi. Bu haqda The Guardian nashri xabar berdi.
“Chernavode” AESning ikkita reaktori Ruminiyaning umumiy elektr energiyasi ishlab chiqarishining qariyb 20 foizini ta’minlaydi. Ulardan biri iyul oyining oxirida, ikkinchisi esa 13-avgust kuni Dunay daryosidagi “sezilarli va davom etayotgan suv sathi pasayishi” tufayli to‘xtatildi. Yaqin o‘n kun ichida uning faoliyatini qayta tiklash rejalashtirilmagan.
**Energetika inqirozi va favqulodda choralar**
Elektr energiyasi taqchilligi fonida Ruminiya avgust oyi davomida energetika sohasida favqulodda holat e’lon qildi. Aholi va kompaniyalardan elektr energiyasi iste’molini tig‘iz vaqtlarda kamaytirish so‘raldi. Yo‘qotilgan quvvatlarni qoplash maqsadida hukumat 330 MVt quvvatga ega qo‘ng‘ir ko‘mir elektr stansiyasini ishga tushirdi. Shuningdek, shamol va gidroelektr stansiyalaridan qo‘shimcha energiya ishlab chiqarish rejalashtirilgan.
Avvalroq rasmiylar energiya tizimiga tushadigan yuklamani kamaytirish uchun Dacia va Ford avtomobil zavodlari 19-avgustgacha faoliyatini to‘xtatishini ma’lum qilgandi.
**Moldova uchun muammolar**
“Chernavode” AESning to‘xtashi qo‘shni Moldova uchun ham jiddiy muammolar tug‘dirmoqda. Moldova Ruminiyadan elektr energiyasi import qiladi va bu import uning taqchilligining 60 foizini qoplaydi. Endi Kishinyov Ukrainadan import hajmini oshirishi yoki G‘arb davlatlaridan qimmatroq elektr energiyasini sotib olishi kerak bo‘ladi. Yana bir ehtimoliy variant – rejali elektr uzilishlari.
Moldovalik energetika mutaxassisi Serjyo Tofilatning so‘zlariga ko‘ra: “O‘ylaymanki, vaziyatning yomonlashishiga, jumladan, elektr energiyasidagi uzilishlarga tayyor turishimiz kerak. Garchi hozir aniq bir narsa deyish qiyin bo‘lsa-da”.
**Qurg‘oqchilikning oqibatlari**
Inqirozga uzoq davom etgan qurg‘oqchilik sabab bo‘lgan. Kopernik Yevropa iqlim xizmati ma’lumotlariga ko‘ra, Dunayning deyarli uchdan ikki qismida iyul oyida suv sarfi 34 yillik kuzatuvlar tarixidagi eng past darajaga tushgan. Suv sathining pasayishi 2850 kilometr uzunlikdagi daryoda kema qatnovini ham qiyinlashtirgan.
Avvalroq Ruminiya AESga suv yetkazish uchun to‘rtta kemani cho‘ktirgan edi. Dunay daryosida suv sathi pasaygach, qariyb 1700 yillik Rim ko‘prigi qoldiqlari ko‘ringandi. Shuningdek, Germaniya harbiy kemasining qoldiqlari ham suv yuzasiga chiqqandi.