Rubio Oʻzbekistonga yoʻl oldi
U 19-oktabr kuni Samarqandda Markaziy Osiyo mamlakatlari tashqi ishlar vazirlarining uchrashuvida ishtirok etadi.
Rubio Oʻzbekistonga yoʻl oldi
AQSH davlat kotibi Marko Rubio Markaziy Osiyo davlatlari tashqi ishlar vazirlari uchrashuvida qatnashish uchun Samarqandga joʻnab ketdi. Unga mintaqaga, jumladan, muhim foydali qazilmalarni qazib olish va qayta ishlash sohasiga sarmoya kiritishga qiziqayotgan 200 dan ortiq amerikalik ishbilarmonlar hamrohlik qilmoqda.
Safar oldidan u aeroportda jurnalistlar bilan suhbatlashdi va Markaziy Osiyoga tashrifining sabablari haqidagi savolga ham javob berdi.
«Biz ayrim mamlakatlarga u yerda inqiroz yuzaga kelgani uchun emas, balki ular bilan munosabatlarni rivojlantirishni istaganimiz uchun boramiz», – dedi u.
Davlat departamenti rahbari bu gap faqat Oʻzbekistonga emas, balki mintaqaning qolgan toʻrtta davlati haqida ham ekanini taʼkidladi.
19-oktabr kuni Samarqandda «S5+1» formatida Markaziy Osiyo mamlakatlari va AQSH tashqi siyosiy idoralari rahbarlarining uchrashuvi boʻlib oʻtadi.
Uchrashuvda Oʻzbekiston, Qozogʻiston, Qirgʻiziston, Tojikiston va Turkmaniston tashqi ishlar vazirlari hamda AQSH davlat kotibi Marko Rubio ishtirok etadi.
Oʻsha kuni Oʻzbekiston TIV rahbari Baxtiyor Saidov va Marko Rubio ikki davlat oʻrtasidagi kengaytirilgan strategik sheriklik muloqotining birinchi davrasini oʻtkazadi.
Tomonlar strategik sheriklikni chuqurlashtirish, siyosiy, savdo-iqtisodiy va investitsiyaviy hamkorlikni kengaytirish, shuningdek, mintaqaviy va xalqaro masalalarni muhokama qiladi.
Bundan tashqari, AQSH va Markaziy Osiyo mamlakatlari ishbilarmon doiralari vakillari ishtirokida uchrashuvlar ham rejalashtirilgan.
Samarqanddagi uchrashuvlardan keyin AQSH davlat kotibi Hindistonga yoʻl oladi.