ROX Group Toshkentda Uchtepa City’ni qurishga 1,5 mlrd dollar investitsiya kiritishni rejalashtirmoqda
Vetnamning ROX Group kompaniyasi Uchtepada 1,5 mlrd dollarli yirik loyiha amalga oshirishni ko‘rib chiqmoqda. 37 gektar yerda ishbilarmonlik va ko‘ngilochar markazlar, turar joylar hamda yangi infratuzilma qurish taklif qilindi. Kompaniya ko‘chmas mulk, energetika va moliyaviy xizmatlarni rivojlantirish niyatida.
ROX Group Toshkentda Uchtepa City qurilishiga 1,5 mlrd dollar yo‘naltirishni rejalashtirmoqda
Prezident Shavkat Mirziyoyev 11-sentabr kuni Vetnamning ROX Group kompaniyasi asoschisi An Tuan Channi qabul qildi. Davlat rahbari matbuot xizmati xabariga ko‘ra, uchrashuvda kompaniyaning ko‘chmas mulk, energetika, moliya sektori va turizm yo‘nalishlaridagi investitsiya loyihalari ko‘rib chiqildi.
ROX Group — 1996-yilda Vetnamda tashkil etilgan ko‘p tarmoqli investitsiya guruhi bo‘lib, ko‘chmas mulk, energetika, bank ishi, mehmonxona biznesi va xizmat ko‘rsatish sohalarida faoliyat yuritadi.
O‘zbekistonda hamkorlikning ustuvor yo‘nalishlari sifatida shahar va sanoat infratuzilmasini rivojlantirish, qayta tiklanadigan energetika, geologiya, moliya sektori va turizm belgilandi. Uchrashuv yakunida tomonlar “yo‘l xaritasi” asosida mavjud va yangi loyihalarni amalga oshirishni tezlashtirishga kelishib oldi.
Toshkent shahri hokimi o‘rinbosari Sharof Rahmonov “O‘zbekiston 24” telekanaliga bergan intervyusida poytaxtda ROX Group bilan ikki asosiy yo‘nalish — qurilish va moliya sohalarida hamkorlik qilish rejalashtirilayotganini aytdi.
Xususan, Uchtepa tumanida 37 gektar maydonda yangi Uchtepa City majmuasini barpo etish taklif qilinmoqda.
“Qurilish sohasida Uchtepa tumanida 37 gektar maydonda Uchtepa City loyihasini amalga oshirishni rejalashtiryapmiz. Loyiha zamonaviy ishbilarmonlik va ko‘ngilochar markazlar, turar joylar hamda mutlaqo yangi infratuzilmani barpo etishni nazarda tutadi”, — dedi hokim o‘rinbosari.
Uning aytishicha, loyiha qiymati 1,5 mlrd dollarga baholanmoqda.
“Uni amalga oshirish hisobiga taxminan uch yil davomida 20 mingga yaqin yangi ish o‘rni yaratilishi ko‘zda tutilgan”, — dedi Rahmonov.
ROX Group asoschisi An Tuan Chan uchrashuvdan keyin kompaniya O‘zbekistonda “yirik, uzoq muddatli va barqaror investitsiya loyihalarini” amalga oshirish niyatida ekanini bildirdi.
“Biz O‘zbekistonda yirik, uzoq muddatli va barqaror investitsiya loyihalarini amalga oshirishni maqsad qilganmiz. Ushbu tashabbuslar Vetnam va O‘zbekiston o‘rtasidagi iqtisodiy hamkorlikni yanada mustahkamlashiga hamda ikkala mamlakat rivojlanishiga hissa qo‘shishiga ishonamiz”, — dedi u.
Biznesmenning so‘zlariga ko‘ra, ROX Group mamlakatda uchta asosiy yo‘nalishni ko‘rib chiqmoqda.
Birinchisi — ko‘chmas mulk, jumladan uy-joylar, tijorat obyektlari, mehmonxonalar va industrial parklar qurilishi. Ikkinchisi — energetika.
“Biz quyosh elektr stansiyalari va ko‘mirda ishlaydigan issiqlik elektr stansiyalarini qurish orqali mamlakatni barqaror energiya manbalari bilan ta’minlamoqchimiz”, — dedi An Tuan Chan.
Uchinchi yo‘nalish moliya va bank xizmatlari bo‘ladi. Uning ta’kidlashicha, kompaniya ushbu sohalarda bir qator loyihalarni belgilab olgan.
“Prezidentga o‘z taklif va rejalarimizni taqdim etganimizdan so‘ng, u ularni amalga oshirishni qat’iy qo‘llab-quvvatlashini bildirdi. Endi bizda amaliy bosqichga o‘tish imkoniyati bor”, — dedi ROX Group asoschisi.
Ko‘chmas mulk sohasidagi loyihalarni nafaqat Toshkentning Uchtepa tumanida, balki Buxoro va Samarqand viloyatlarida ham amalga oshirish rejalashtirilmoqda.
An Tuan Chan, shuningdek, Markaziy Osiyoning boshqa mamlakatlariga nisbatan O‘zbekiston bank tizimining jadal rivojlanayotganini alohida ta’kidladi.
2025-yilning dekabr oyida prezident 37 gektar maydonda Uchtepa City qurish rejalari haqida ma’lum qilgan edi.
O‘shanda loyiha qiymati 1 mlrd dollarga baholangan. Unda zamonaviy mehmonxona, biznes markazlar, savdo-ko‘ngilochar majmuasi va apartamentlar qurish ko‘zda tutilgan edi.