Rostovda dronlar hujumi: neft terminalida yongʻin, poyezdlar toʻxtadi
10-oktabrga oʻtar kechasi Rossiyaning Rostov viloyatiga dronlar hujum qildi. Astra nashri Rostov-Dondagi neft terminalida yongʻin chiqqanini xabar qildi. Viloyat gubernatori esa temiryoʻl koʻprigi shikastlangani, poyezdlar harakati toʻxtatilgani va bir erkak yaralanganini bildirdi.
Rostovda dronlar hujumi sodir bo‘ldi: neft terminalida yong‘in yuz berdi, poyezdlar harakati to‘xtatildi
DW xabariga ko‘ra, Astra ochiq manbali videolarni tahlil qilib, hujum nishoni Rostov-Donning Jeleznodorojniy tumanida joylashgan Novoshaxtinsk neft mahsulotlari zavodi terminali bo‘lganini aniqlagan.
Guvohlar kuchli yong‘in va portlashlar haqida ma’lum qilgan. Ukrainaning Exilenova+ monitoring kanali ham guvohlar videolari hamda NASA FIRMS platformasi ma’lumotlariga tayangan holda, aynan shu terminalga zarba berilganini yozgan.
Avval «Yug Rusi» nomi bilan tanilgan terminalning loyihaviy quvvati yiliga qariyb 2,5 million tonnani tashkil etadi. Astra ma’lumotiga ko‘ra, u neft mahsulotlarini eksport uchun qayta yuklashga xizmat qiladi, shuningdek, Rossiya Qurolli kuchlarini yonilg‘i bilan ta’minlashda ham ishlatiladi.
Rostov viloyati gubernatori Yuriy Slyusar hududga 50 dan ortiq uchuvchisiz apparat hujum qilganini va viloyat markazida yong‘in chiqqanini tasdiqlagan.
Uning aytishicha, bir erkak yaralangan. Shaharning bir nechta tumanida ko‘p qavatli turar joylar shikastlangan, aholi evakuatsiya qilingan.
Hujum oqibatida temiryo‘l ko‘prigi ham zarar ko‘rgan. Shu sababli poyezdlarning har ikki yo‘nalishdagi qatnovi to‘xtatilgan.
Slyusar Bataysk shahrida ham dron hali aholi ko‘chib kirmagan ko‘p qavatli uyga urilganini bildirgan. Bu yerda ham yong‘in chiqqan.
Astra Rostov-Dondagi zarar ko‘rgan turar joyning suratini ham e’lon qilgan. Nashrning OSINT tahliliga ko‘ra, bu Privokzalnaya ko‘chasidagi yangi «Donskaya Sloboda» turar joy majmuasida joylashgan ko‘p qavatli uydir.