Rossiyalik shaxmatchilar Oʻzbekistonda oʻtadigan olimpiadada ishtirok etmaydi
FIDE rossiyalik grossmeysterlarni Samarqandda oʻtadigan Butunjahon shaxmat olimpiadasidan mahrum qildi.
Rossiyalik shaxmatchilar Oʻzbekistonda boʻlib oʻtadigan olimpiadada ishtirok etmaydigan boʻlishdi. Rossiya shaxmat federatsiyasi (RSHF) maʼlum qilishicha, Rossiyaning erkaklar va ayollar terma jamoalari 15-sentabrda Samarqandda boshlanadigan Butunjahon shaxmat olimpiadasida qatnashmaydi.
Ushbu musobaqada ularning oʻynashiga ruxsat bermaslik haqidagi qaror Xalqaro shaxmat federatsiyasi (FIDE) kengashi tomonidan 23-avgust kuni boʻlib oʻtgan yigʻilishida "Rossiya masalasi" koʻrib chiqilgandan soʻng qabul qilindi. FIDE kengashi tashkilotning oliy ijro organi hisoblanadi.
Bu Chennay–2022 (Xitoy) va Budapesht–2024 (Vengriya) olimpiadalaridan keyin Rossiyasiz oʻtadigan ketma-ket uchinchi turnir boʻladi.
Avvalroq, 2025-yil yanvar oyida FIDE kengashi Rossiya va Belarusning bolalar-oʻsmirlar va paralimpiya jamoalarini rasmiy musobaqalarga qoʻyishga ruxsat bergan edi. Oʻsha yilning iyun oyida esa Rossiya ayollar terma jamoasining jamoaviy jahon chempionatida ishtirok etishi maʼqullangan va yakunda terma jamoa bu musobaqada gʻolib chiqqan edi. Bu holat sanksiyalarni yumshatish tomon ketayotganini koʻrsatardi.
Biroq, 2026-yil 10-iyun kuni FIDE Sport arbitraj sudi (CAS) qarorini bajarmagani uchun Rossiya shaxmat federatsiyasining (RSHF) aʼzoligini vaqtincha toʻxtatib qoʻydi. CAS qaroriga koʻra, RSHF Ukrainaning bosib olingan Qrim, Sevastopol, DXR, LXR, Xerson va Zaporojye viloyatlarida shaxmat faoliyatini boshqarishni hamda tadbirlar oʻtkazishni toʻxtatishi kerak edi.
RSHF ijrochi direktori Aleksandr Tkachyovning xabar berishicha, 2026-yil 23–24-avgust kunlari FIDE Prezident kengashi rossiyalik grossmeysterlarni Butunjahon olimpiadasiga qoʻymaslik haqida qaror qabul qilgan. Uning soʻzlariga koʻra, kengash aʼzolarining aksariyati Rossiya terma jamoasining ishtirokiga qarshi chiqqan. Tkachyov bu tashabbus FIDE prezidenti vazifasini bajaruvchi Vishvanatan Ananddan chiqqanini taʼkidladi.
Eslatib oʻtamiz, FIDE prezidenti vakolatlarini bajarishni toʻxtatgan rossiyalik Arkadiy Dvorkovich iyul oyida Yevropa Ittifoqi unga qarshi sanksiyalar joriy qilganidan soʻng oʻzini chetga olgan edi. Hozirda prezident vazifasini Vishvanatan Anand bajarmoqda.