Rossiyaga qarshi «ayovsiz sanksiyalar» AQSH Kongressida maʼqullandi
Endi hujjat imzolash uchun prezident Donald Trampga yuboriladi.
Rossiyaga qarshi «ayovsiz sanksiyalar» AQSH Kongressida tasdiqlandi
AQSH Kongressining Vakillar palatasi avvalroq Senatdan oʻtgan Rossiyaga qarshi «doʻzax sanksiyalari» haqidagi qonun loyihasini maʼqulladi. Endi hujjat imzolash uchun prezident Donald Trampga yuboriladi.
Uni deyarli barcha respublikachilar hamda 58 nafar demokrat qoʻllab-quvvatladi.
«Lindsi Gremning Rossiya va Eronga qarshi 2026-yilgi sanksiyalar toʻgʻrisidagi akti» nomli qonun loyihasi Rossiyaning energetika va mudofaa tarmoqlariga, shuningdek, amaldagi sanksiyalarni chetlab oʻtishda foydalaniladigan tankerlarning «maxfiy floti»ga qarshi yangi cheklovlarni nazarda tutadi.
Bundan tashqari, hujjat Trampga Xitoy, Hindiston va boshqa davlatlar tomonidan Rossiya nefti va gazini xarid qilish hajmini kamaytirish maqsadida ularga nisbatan 100 foizgacha bojlar joriy etish vakolatini beradi. Qonun loyihasiga Eronga qarshi sanksiyalarni kengaytirish ham kiritilgan. Tashabbus norasmiy ravishda «ayovsiz sanksiyalar» haqidagi qonun loyihasi deb atalmoqda.
Senat qonun loyihasini avgust oyida maʼqullagan edi. Ovoz berishdan oldin Ukraina prezidenti Volodimir Zelenskiy amerikalik qonunchilar bilan uchrashib, ularni hujjatni qoʻllab-quvvatlashga chaqirdi va protsessual ovoz berishlardan birini bevosita Senat zalidan kuzatdi. Reuters hisob-kitoblariga koʻra, qonun loyihasi Trampning Oq uyga qaytishi va 2025-yil yanvarida har ikki palata respublikachilar nazoratiga oʻtganidan keyin Kongress tomonidan qabul qilingan Ukraina bilan bogʻliq eng muhim hujjat boʻldi.
Hujjatni koʻrib chiqish bir yildan ortiq davom etdi. Lindsi Grem va bir necha oʻnlab senatorlar uni 2025-yil aprel oyida kiritgan edi, biroq Kongressning respublikachi rahbariyati ovoz berishni oʻtkazish uchun Trampning roziligini faqat 2026-yil iyulida, Grem oʻlimidan bir necha kun oldin oldi. Shundan soʻng qonun loyihasiga uning nomi berildi.
Vakillar palatasidagi demokratlarning katta qismi hujjatga qarshi chiqdi. Ularning fikricha, qonun loyihasi Trampga bojlar joriy etish, jumladan, AQSH ittifoqchilariga qarshi bojlar kiritish uchun juda keng vakolatlar beradi, shu bilan birga, agar prezident sanksiyalarni mamlakat milliy manfaatlariga zid deb hisoblasa, ularni qoʻllamaslik imkonini beradi. Vakillar palatasidagi demokratlar yetakchisi Hakim Jeffrisning aytishicha, ushbu istisnolar sabab Rossiyaga zarar yetkazishi mumkin boʻlgan yangi sanksiyalar joriy etilmay qolishi mumkin.