Rossiyada pedofillar reyestri tuziladi
Rossiyada voyaga yetmaganlarga nisbatan jinsiy zo‘ravonlik qilgan shaxslarning yagona elektron reyestri tuzilishi rejalashtirilmoqda. Bu haqda Meduza nashri Davlat dumasi deputati Anastasiya Udalsovaga tayanib xabar berdi.
Ma’lumotlarga ko‘ra, Kseniya Sobchakning “Krovavaya barinya” Telegram-kanali Udalsovaning iyun oyidagi so‘roviga berilgan javob xatining skrinshotlarini e’lon qilgan. Hujjat Rossiya bosh vaziri o‘rinbosari Denis Manturov tomonidan imzolangan.
Unda Ichki ishlar vazirligi bunday reyestrni yaratish bo‘yicha tajriba-konstruktorlik ishlarini olib borayotgani qayd etilgan. Tizimni 2027-yilda ishga tushirish ko‘zda tutilgan. Udalsovaning o‘zi bu xatni o‘z kanalida e’lon qilmagan bo‘lsa-da, Sobchak va yana ikkita kanalning ushbu xabarini qayta joylashtirgan.
Xususan, xavfsizlik kuchlari bilan yaqin aloqada bo‘lgan “Baza” Telegram kanali ham o‘z manbalariga tayanib, bunday reyestr tuzilayotgani haqida avvalroq xabar bergan edi. Udalsova bilan suhbatlashgan Expert nashri ham xuddi shunday xabarni e’lon qildi. Jurnalistlarning ta’kidlashicha, ularning qo‘lida ham Sobchak kanali keltirgan hujjat mavjud.
Har uchala manbaning ma’lumotiga ko‘ra, yangi baza “Zo‘ravon pedofil” deb nomlanadi. Expert nashri bazaning yopiq bo‘lishini va undan faqat Ichki ishlar vazirligi xodimlari foydalana olishini xabar qilmoqda. Biroq Udalsova bu reyestr ochiq bo‘lishi kerak deb hisoblaydi. Ushbu baza qanday shakllantirilishi hozircha noma’lum. Xususan, unga ilgari sudlangani olib tashlangan shaxslar kiritilishi yoki kiritilmasligi noaniq bo‘lib qolmoqda.
Rossiyada bunday bazani yaratish g‘oyasi so‘nggi o‘n yildan beri muhokama qilib kelinmoqda. 2015-yilda “Adolatli Rossiya” partiyasi raisi Sergey Mironov Tergov qo‘mitasi rahbari Aleksandr Bastrikinga shunday taklif kiritgan edi. Deputat pedofillarning ochiq bazasini yaratish xalqaro amaliyotga mos kelishini ta’kidlagan edi.
Iyul oyida Raqamli rivojlanish, aloqa va ommaviy kommunikatsiyalar vazirligi internetdagi jinoyatlarga qarshi kurashish tizimini rivojlantirish bo‘yicha loyihani e’lon qildi. Hujjatda shunday reyestrni yaratish masalasini ko‘rib chiqish zarurligi aytilgandi. Biroq taklif etilgan barcha mexanizmlarni amaliyotga joriy etish 2029-yilgacha rejalashtirilmagan edi.