Rossiyada migrantlarni mamlakatdan chiqarib yuborish mumkin boʻlgan qoidabuzarliklar roʻyxati ikki baravarga oshirildi
Rossiyada migrantlarni mamlakatdan chiqarib yuborish mumkin boʻlgan qoidabuzarliklar roʻyxati ikki baravarga kengaytirildi
2026 yil 3 noyabrdan boshlab Rossiyada xorijiy fuqarolarni chiqarib yuborishning yangi qoidalari amal qila boshladi. Endilikda nafaqat migratsiya qoidalarini buzish, balki mayda bezorilik, noqonuniy mitinglarda ishtirok etish va boshqa huquqbuzarliklar ham chiqarib yuborishga asos boʻlishi mumkin. Asoslar soni 22 tadan 45 tagacha koʻpaydi.
Xususan, xorijiy fuqarolarga mayda bezorilik; taqiqlangan simvolikani namoyish qilish; Rossiyaning hududiy yaxlitligini buzishga chaqiriqlar; nomaqbul tashkilotlar faoliyatida ishtirok etish; RF Qurolli kuchlarini obroʻsizlantirish; ommaviy tadbirlarni oʻtkazish qoidalarini buzish; Rossiyaga qarshi sanktsiyalar joriy etishga chaqiriqlar; politsiya xodimi yoki harbiy xizmatchining qonuniy talablariga boʻysunmaslik; davlat chegarasini buzish; kamsitish va OAV erkinligini suiisteʼmol qilish kabi qoidabuzarliklar uchun chiqarib yuborish xavf solishi mumkin.
Maʼmuriy chiqarib yuborish toʻgʻrisidagi qarorni sud qabul qiladi. Ishni koʻrib chiqishda huquqbuzarlik holatlari va boshqa muhim omillar hisobga olinadi.
Qaror chiqarilgandan soʻng xorijlik Rossiya hududini tark etishi shart. Vaziyatga qarab, chiqarib yuborish yoki nazorat ostida ixtiyoriy ravishda, yoki majburiy tarzda amalga oshiriladi.
Bir qator oʻta jiddiy qoidabuzarliklar, xususan, terrorizm va ekstremizmga chaqiriqlar bilan bogʻliq holatlar uchun aynan majburiy chiqarib yuborish nazarda tutilgan.
Qonun muhokamasi chogʻida farzandlari Rossiya fuqarosi boʻlgan xorijliklar masalasi alohida koʻtarildi.
IIVda tushuntirilishicha, yangi qonunda bunday holatlar uchun maxsus mustasnolar nazarda tutilmagan. Shu bilan birga, har bir holat aniq holatlarni hisobga olgan holda alohida koʻrib chiqiladi. Biroq, Rossiya fuqaroligiga ega farzandlarning mavjudligining oʻzi chiqarib yuborishdan ozod qilishni kafolatlamaydi.
Oʻzgarishlar nafaqat chiqarib yuborish asoslariga, balki migratsiya qoidalarini buzganlik uchun maʼmuriy jarimalar miqdoriga ham taʼsir koʻrsatdi.
Davlat Dumasida taqdim etilgan maʼlumotlarga koʻra, endi: kirish va boʻlish qoidalarini buzganlik uchun jarima 4 ming rubldan boshlanadi; takroriy qoidabuzarlik uchun — 7 ming rubldan; noqonuniy mehnat faoliyati uchun — 4 ming rubldan; mehnat faoliyati qoidalarini takroran buzganlik uchun — 7 ming rubldan boshlanadi.
Hokimiyat organlari oʻzgarishlarni xorijiy fuqarolar tomonidan qonunchilikka rioya etilishi ustidan nazoratni kuchaytirish va jamoat xavfsizligini taʼminlash zarurati bilan izohlamoqda.
Maʼlumotlarga koʻra, oxirgi bir yarim yil ichida turli qoidabuzarliklarga yoʻl qoʻygan migrantlarni chiqarib yuborish soni 2,6 baravarga ortgan.
2025 yilda Rossiyadan 72 ming nafar xorijiy fuqaro chiqarib yuborilgan.