Rossiyada ikki o‘smir “Kalmar o‘yini” ta’sirida 12 yoshli maktab o‘quvchisini o‘ldirdi
Rossiyada ikki o‘smir qiz "Kalmar o‘yini" serialidan ilhomlanib, 12 yoshli maktab o‘quvchisini o‘ldirganlikda gumonlanib hibsga olindi. Moskva viloyati politsiyasi Orexovo-Zuyevo shahar okrugida sodir bo‘lgan ushbu jinoyat bo‘yicha tergov olib bormoqda, deya xabar beradi Meduza.
Voqea 26-avgust kuni Kabanovo qishlog‘ida 12 yoshli bolaning g‘oyib bo‘lishi bilan boshlangan. Uni qidirishga ko‘ngillilar ham jalb qilingan. Ertasi kuni bolaning jasadi tashlandiq binoning yerto‘lasidan ko‘plab pichoq jarohatlari bilan topilgan. Bu bino ilgari mahalliy kasb-hunar bilim yurtining yotoqxonasi bo‘lgan.
Tez orada jinoyatni sodir etganlikda gumon qilinib, 15 va 16 yoshli ikki nafar mahalliy qiz qo‘lga olindi. Tergovchilar qotillik moddasi bo‘yicha jinoyat ishi qo‘zg‘atdi.
OAV va Telegram-kanallar huquq-tartibot idoralaridagi manbalarga tayanib xabar berishicha, yuqori sinf o‘quvchilari qotillikni oldindan rejalashtirgan. Ular pichoqlar va qo‘lqoplarni tayyorlab qo‘ygan. Qizlar bolani bir qishloqda yashaydigan qo‘shnisi sifatida tanishgan.
Bola yo‘qolgan kuni ular uni pivo ichish bahonasi bilan sayrga taklif qilib, tashlandiq binoga aldab olib borgan. Politsiyadagi manba "Komsomolskaya pravda" nashriga qizlar odamlarning qanday o‘lishini ko‘rmoqchi bo‘lganini aytgan. Ba’zi manbalarga ko‘ra, qizlar qotillikni telefonga tasvirga olgan bo‘lishi mumkin, bu qandaydir video-chellenjning bir qismi bo‘lgan. Boshqa manbalar esa gumonlanuvchilar izlarni yashirish uchun telefonlarini ataylab o‘zlari bilan olib ketishmaganini da’vo qilmoqda. Jinoyatdan so‘ng ular xotirjam uyga qaytgan.
Halok bo‘lgan bolaning onasi Irina "msk1" nashriga qo‘lga olinganlarning boshqa qotilliklarni ham rejalashtirganini aytdi. Uning so‘zlariga ko‘ra, taxminlardan biriga ko‘ra, qizlarni Janubiy Koreyaning "Kalmar o‘yini" seriali ilhomlantirgan. Bu serialda qahramonlar omon qolish uchun shafqatsiz o‘yinlarda bellashadi. "Bu yakuniy xulosalarmi yoki tergovchilarning fikrimi, bilmayman. Ular bunday xulosaga kelishiga qizlardan birining xonasida ushbu serial posterlari osig‘liq turgani sabab bo‘lgan", dedi u.
Shuningdek, gumonlanuvchining TikTok sahifasidan serialdagi qotilliklar lavhalari yig‘ilgan video topilgan. Kabanovolik bir rezident ikkala qiz ham bosiq va urushqoq bo‘lmaganini aytdi, lekin maktabdagi tengdoshlari ular bilan kamdan-kam muloqot qilgan. "Ular o‘zaro yaxshi va inoq munosabatda edi. Tez-tez gaplashib, birga sayr qilishardi. Qizlar haqiqatan ham yaxshi dugonalarga o‘xshardi. Endi bu fojiani eshitib, rostdan ham yig‘lagim kelyapti", dedi u.
Ayolning ta’kidlashicha, qizlarning yonidan 50 kishilik ro‘yxat topilgan. Ushbu ro‘yxatda halok bo‘lgan bola ham bo‘lgan. U qizlarning hech qanday submadaniyatlarga, masalan, satanizm yoki shunga o‘xshash narsalarga aloqasi yo‘qligini, lekin "Kalmar o‘yini"ga haqiqatan ham berilib ketganini qo‘shimcha qildi.
Xavfsizlik tuzilmalariga yaqin bo‘lgan REN nashri qo‘lga olinganlarning ko‘rsatmalarini keltirdi. Gumonlanuvchilardan biri so‘roq paytida uzoq vaqtdan beri "qon nimaligini va odam o‘ldirish qanday bo‘lishini" bilmoqchi bo‘lganini tan olgan.
Avvalroq Tailanddagi maktablardan birida 7-avgust kuni o‘quvchi otishma uyushtirgani haqida xabar berilgandi. U hujumdan oldin uyida bobo-buvisini otib o‘ldirgani aniqlangan. O‘smirning hujumlari oqibatida jami 7 kishi halok bo‘lgan. Ularning besh nafari Debsirin Nonthaburi maktabi qurbonlari hisoblanadi. O‘quvchi hujum so‘ngida o‘z joniga qasd qilgan.