Rossiyada harbiylar va politsiyachilar jinoyatlari statistikasi yashirildi
Rossiya Oliy sudi huzuridagi Sud departamentining 2025-yilga oid hisobotlarida harbiylar va huquqni muhofaza qiluvchi organlar xodimlari sodir etgan jinoyatlar haqidagi maʼlumotlar ochiqlanmadi. Davlatga xiyonat, josuslik va armiyani «obroʻsizlantirish» kabi ishlar boʻyicha statistika ham yopilgan.
Rossiyada harbiylar va politsiyachilar sodir etgan jinoyatlar statistikasi yashirildi
DW xabariga ko‘ra, 2-oktabr kuni e’lon qilingan hisobotlardagi o‘zgarishlarga «Vyorstka» nashri e’tibor qaratgan.
Cheklovlar davlat xavfsizligiga oid ishlar, siyosiy ta’qiblarda qo‘llanadigan moddalar hamda harbiylar va kuch tuzilmalari xodimlari jinoyatlariga doir ma’lumotlarni qamrab olgan.
Yig‘ma statistikada fuqarolarni vafot etgan yoki bedarak yo‘qolgan deb topish haqidagi sudga berilgan arizalar soni yashirilgan.
«Vyorstka» ma’lumotiga ko‘ra, 2024-yilda Sud departamenti bunday arizalar soni rekord darajaga — 17,5 mingtaga yetganini bildirgan edi.
2025-yil oxirida esa Rossiya sudlari shunday ishlarni ko‘rib chiqishga oid ma’lumotlarni o‘z saytlaridan o‘chira boshlagan.
Nashr yozishicha, Rossiya Jinoyat kodeksining siyosiy ta’qiblarda qo‘llanadigan 28 ta moddasi bo‘yicha ma’lumotlar ham maxfiylashtirilgan.
Ular orasida davlatga xiyonat, xorijiy davlatlar bilan hamkorlik, josuslik, davlat sirini oshkor qilish, diversiya, ekstremistik hamjamiyat tashkil etish va armiyani «obro‘sizlantirish»ga oid ishlar bor.
Shuningdek, «chet el agenti» majburiyatlarini bajarishdan bo‘yin tovlash bilan bog‘liq statistika ham ochiqlanmagan.
Ma’muriy ishlar orasida armiyani «obro‘sizlantirish», adovat qo‘zg‘atish, separatizmga chaqirish va «chet el agenti» faoliyati tartibini buzish bo‘yicha ma’lumotlar yopilgan.
Sud departamenti harbiy xizmatchilardan tashqari sudyalar, prokurorlar, tergovchilar, politsiyachilar va Jazoni ijro etish federal xizmati xodimlari sodir etgan jinoyatlar bo‘yicha statistikani ham ochiqlamagan.
Idora 2026-yil aprelida «Vajnyye istorii» nashriga bergan izohida sud statistikasiga kirish cheklanishini «ma’lumotlarni e’lon qilish reglamenti o‘zgargani» bilan tushuntirgan.