Rossiya zarbalari Ukrainada 28 kishining hayotiga zomin boʻldi
Rossiyaning 7-oktabrdagi raketa va dron hujumlari oqibatida Ukrainada 28 kishi halok boʻldi, deb bildirdi mamlakat ichki ishlar vaziri Ivan Vigovskiy. Priluki shahridagi koʻp qavatli uyga zarba natijasida 20 kishi, jumladan, besh bola hayotdan koʻz yumgan.
Rossiya zarbalari Ukrainada 28 kishining umriga zomin bo‘ldi
Vigovskiy 7-oktabr oqshomida bergan ma’lumotga ko‘ra, qutqaruvchilar va politsiya xodimlari vayronalar ostidan, shikastlangan binolardan hamda yong‘inlardan jami 29 kishini qutqarib olishgan.
Ukraina prezidenti Volodimir Zelenskiy shu kuni kechqurun hujumlar oqibatida 100 kishi jarohat olganini bildirgan. Uning aytishicha, Rossiya ballistik va qanotli raketalar hamda «Shahed» dronlaridan foydalangan. Kunduzi ham dronlar va aviabombalar bilan yangi zarbalar berilgan.
Eng og‘ir oqibatlar Chernixiv viloyatining Priluki shahrida qayd etilgan. Bu yerda raketa ko‘p kvartirali turar joy binosiga kelib tushgan. Ichki ishlar vaziri ma’lumotiga ko‘ra, halok bo‘lgan besh bolaning uchtasi bir yoshda bo‘lgan.
Vazir bu haqda xabar bergan paytda Prilukida vayronalarni tozalash hamda qidiruv-qutqaruv ishlari 14 soatdan ortiq davom etayotgan edi. Chernixiv viloyati harbiy ma’muriyati rahbari Vyacheslav Chaus avvalroq shaharda 50 dan ziyod kishi jabrlanganini aytgan.
Zelenskiyning so‘zlariga ko‘ra, 7-oktabr kuni Ukrainadagi 13 hudud hujumga uchragan. Rossiya qo‘shinlari 70 ta raketa, shuningdek, zarbador dronlardan foydalangan.
Ukraina prezidenti xalqaro yetakchilarni hujumlarga munosabat bildirishga chaqirgan. U Rossiyaga nisbatan sanksiyalarni yumshatish yoki ayrim oligarxlarga qo‘yilgan cheklovlarni olib tashlash haqidagi signallarni tanqid qilgan.
Zelenskiy fikricha, Rossiyaning neft sotishdan daromad olishda davom etayotgani urushni moliyalashtirish imkonini saqlab qolmoqda. U buni Ukraina bilan birga Yevropa va G‘arb mamlakatlari uchun ham muammo deb baholagan.
Qurbonlar va jarohatlanganlar haqidagi raqamlar Ukraina rasmiylarining 7-oktabr kechqurungi bayonotlariga asoslangan.