Rossiya maktablarida harbiy tayyorgarlik soatlari ikki baravar ko‘paytirildi
Rossiya maktablarida harbiy tayyorgarlik soatlari ikki baravar oshirildi
Rossiya maktablarida boshlang‘ich harbiy tayyorgarlikka ajratilgan soatlar soni ikki baravardan ham ko‘proq ko‘paytirildi. Bu haqda Rossiya ta’lim vaziri Sergey Kravtsov “RIA Novosti” agentligiga bildirgan.
“Biz boshlang‘ich harbiy tayyorgarlik soatlarini ko‘paytirdik. Joriy o‘quv yilidan boshlab unga Vatan xavfsizligi va himoyasi asoslari kursining 50 foizi, ya’ni to‘rt o‘quv yili davomida 68 soat ajratiladi”, deya vazirning so‘zlarini keltiradi agentlik.
Rossiya rasmiylari Ukrainaga qarshi urush sharoitida maktablarda 8–11-sinf o‘quvchilari uchun harbiy tayyorgarlikni yo‘lga qo‘ygan. 2026-yilgacha bu fanga Vatan xavfsizligi va himoyasi asoslari kursining 20 foizi ajratilgan edi.
Boshlang‘ich harbiy tayyorgarlik SSSR maktablarida ham bo‘lgan. 1993-yilda u o‘quv dasturidan chiqarib tashlangan, ammo 2023-yilda Hayot faoliyati xavfsizligi asoslari (“OBJ”) fani doirasidagi mashg‘ulotlar tarkibida qayta tiklangan. 10–11-sinf o‘quvchilariga Kalashnikov avtomatidan o‘q uzish, qo‘l granatalarini uloqtirish va birinchi yordam ko‘rsatish o‘rgatilgan. 2024-yildan boshlab Rossiya maktablarida “OBJ” o‘rniga Vatan xavfsizligi va himoyasi asoslari joriy etildi.
2026-yil may oyida “Vot Tak” nashri Rossiya hukumati besh yil ichida maktab o‘quvchilari uchun harbiy-vatanparvarlik markazlariga 50 milliard rubldan ortiq mablag‘ ajratganini yozdi. Bundan tashqari, Yel universiteti tadqiqotchilari Rossiya va Ukrainaning bosib olingan hududlarida kamida 210 ta maxsus ta’lim muassasasini aniqladi. Ularning ma’lumotlariga ko‘ra, urush boshlanganidan beri ushbu muassasalarda majburiy ravishda ko‘chirilgan ukrainalik bolalar joylashtirilib, ularga majburiy harbiy tayyorgarlik o‘rgatilmoqda.