Rossiya Kiyevga hujumlarni tikladi, Ukraina esa Saratovga hujum qildi (video)

Rossiya Kiyevga hujumlarni qayta boshladi, Ukraina esa Saratovga zarba berdi (video)

8-sentyabrga o‘tar kechasi Rossiya qo‘shinlari Kiyev shahriga raketa hujumi uyushtirdi. Shu kuni Ukraina dronlari Saratov viloyatiga hujum qildi.

Kiyev meri Vitaliy Klichko bergan ma’lumotga ko‘ra, poytaxtning oltita tumanida ma’muriy binolar, omborlar, ta’lim muassasalari va turar joylar shikastlangan. Rossiya zarbalari oqibatida ikki kishi halok bo‘lgan, o‘n kishi jarohat olgan. Shifokorlar jabrlanganlardan ikki nafarining ahvolini og‘ir deb baholamoqda.

Ukraina Havo kuchlari qo‘mondonligi ma’lumotiga ko‘ra, Kiyevga hujumda turli rusumdagi raketalar va urib tushirish qiyin bo‘lgan reaktiv dronlardan foydalanilgan. Rossiya qo‘shinlari 5-7-sentyabr kunlari — AQSH prezidentining elchilari Stiv Uitkoff va Jared Kushnerning Ukrainaga tashrifi vaqtida — Kiyevga hujum qilmagan edi.

Saratov viloyati gubernatori Roman Busargin so‘zlariga ko‘ra, dronlar hujumi natijasida bir nechta xususiy uy zarar ko‘rgan. Jami 10 kishi, jumladan uch nafar bola jarohatlangan, ulardan olti nafari shifoxonaga yotqizilgan. Aholi uchun vaqtinchalik yashash punktlari tashkil etilgan.

Ukrainaning Exilenova+ va Supernova+ monitoring Telegram kanallari dronlar Saratov neftni qayta ishlash zavodiga zarba berganini bildirdi. Shuningdek, Engels shahridagi harbiy aerodrom ham nishonga olingani aytilmoqda.

Rossiya Mudofaa vazirligi 8-sentyabr kuni ertalab bir kecha davomida Rossiya hududi va anneksiya qilingan Qrim osmonida Ukrainaning 384 ta droni yo‘q qilinganini ma’lum qilgandi.