Rossiya hujumlaridan keyin Vinnitsa elektrsiz qoldi, jabrlanganlar orasida bolalar bor
Rossiyaning Ukrainaga hujumlari oqibatida Vinnitsa shahrida elektr taʼminoti uzildi, muhim infratuzilma obyektlari zaxira manbalariga oʻtkazildi. Xarkiv va Zaporijjya viloyatida jabrlanganlar orasida kamida toʻrt nafar bola borligi xabar qilindi.
Rossiya hujumlaridan soʻng Vinnitsa elektr taʼminotisiz qoldi, jabrlanganlar orasida bolalar ham bor
DW xabariga koʻra, Vinnitsa meri Sergey Morgunov 17-oktabr ertalab shahar Rossiya hujumidan keyin elektrsiz qolganini maʼlum qilgan. Elektr transporti harakati toʻxtagani sababli yoʻnalishlarga qoʻshimcha avtobus va yoʻnalishli taksilar chiqarilishi belgilangan.
Ukraina Favqulodda vaziyatlar davlat xizmati maʼlumotiga koʻra, 17-oktabr tongida Zaporijjya viloyatiga berilgan zarbada kamida besh kishi, jumladan, bir bola jabrlangan. Jabrlanganlar soniga aniqlik kiritilayotgani aytilgan.
Qutqaruvchilar ikki avtomobil va 50 kvadrat metr maydondagi noturar joyda chiqqan yongʻinlarni oʻchirgan. Turar joylar ham shikastlangan.
Xarkivda esa 17-oktabr ertalabiga kelib Rossiya hujumlaridan 15 kishi, shu jumladan, uch nafar bola jabrlangani maʼlum boʻlgan.
Qutqaruvchilarning bildirishicha, 16-oktabr kechqurungi raketa zarbalaridan biri Nemishlyanskiy tumanidagi ombor binosiga tekkan. Natijada 100 kvadrat metr maydonda yongʻin chiqqan, yaqindagi koʻp qavatli uylar va boshqa obyektlar zarar koʻrgan. Hujum oqibatida yuzaga kelgan toʻrtta yongʻin oʻchogʻi bartaraf etilgan.
Rovno viloyatida ham korxonalardan biri hududida yongʻin chiqqan. Dastlabki maʼlumotlarga koʻra, ikki kishi jarohatlangan. Korxonaning nomi va faoliyat yoʻnalishi ochiqlanmagan.
Ukraina Qurolli kuchlari Havo kuchlari maʼlumotiga koʻra, 17-oktabrga oʻtar kechasi Rossiya «Iskander-M»/KN-23 ballistik raketalari, X-22/32 qanotli raketalari, toʻrtta «Kalibr» raketasi hamda 332 ta turli uchuvchisiz apparatni qoʻllagan. Ular orasida zarba beruvchi dronlar bilan birga chalgʻituvchi apparatlar ham boʻlgan.
Havo kuchlari ertalab soat 08:00 holatiga koʻra, toʻrtta «Kalibr» raketasi va 289 ta dron urib tushirilganini bildirgan. Shu bilan birga, 22 ta joyda zarbalar, yana uchta joyda parchalar tushishi qayd etilgan. Hisobotda ballistik raketalar urib tushirilgani haqida maʼlumot keltirilmagan.
Rossiya Mudofaa vazirligi esa Zaporijjya viloyatida Ukraina qoʻshinlarining tayanch punktlari, «Zaporojstal» metallurgiya kombinati va «Zaporojtransformator» korxonasiga zarbalar berilganini bildirgan. Idora soʻnggi korxona Ukraina Qurolli kuchlari manfaatlarida ishlatilganini daʼvo qilgan.
Rossiya tomoni, shuningdek, Kriviy Rixdagi metallurgiya kombinati va Jitomirdagi elektr podstansiyasi nishonga olinganini maʼlum qilgan. Vazirlik podstansiyani harbiy-sanoat korxonalari uchun elektr taqsimlovchi obyekt sifatida taʼriflagan.