Rossiya amerikalik sobiq askar Gilmanni “gumanitar sabablarga ko‘ra” ozod qildi
Avvalroq Vashington Moskvani amerikalik fuqaroni vatanida davolanishi uchun ozod qilishga chaqirgan edi.
Rossiya hukumati Voronej koloniyasida jazo muddatini o‘tayotgan 32 yoshli amerikalik sobiq dengiz piyodasi Robert Gilmanni ozodlikka chiqardi. Reuters agentligining xabar berishicha, Rossiya prezidenti Vladimir Putin Gilmanni "gumanitar sabablarga ko‘ra" afv etgan. Avvalroq Vashington Moskvani amerikalik fuqaroni o‘z vatanida davolanishi uchun ozod qilishga chaqirgan edi.
Gilmanning oilasi uning ahvolidan jiddiy xavotirda edi, chunki u qiynoqlar va ongni o‘zgartiruvchi dorilar yuborilayotganidan shikoyat qilgan. Yaqinlarining so‘zlariga ko‘ra, Gilman iyun oyidan beri ruhiy tushkunlikka tushib qolgan va zond orqali ovqatlantirilayotgan edi. Uning singlisi akasining o‘lim yoqasida bo‘lishi mumkinligini taxmin qilgan.
Reuters manbalarining ma’lumotlariga ko‘ra, 11-avgust kuni Gilman uni Vashingtonga olib ketishi kerak bo‘lgan Davlat departamenti samolyoti bortida bo‘lgan. Agentlik suhbatdoshlaridan biri sobiq mahbusni ko‘rganini va uning yurgani hamda gapirganini tasdiqlagan.
Gilmanning rossiyalik advokati Irina Brajnikova "Interfaks"ga uning ozod etilishi ehtimoli haqida ma’lumotga ega emasligini, biroq buni istisno etmasligini bildirgan. "Men hech narsa bilmayman, lekin katta ehtimol bilan shunday. Menga hali hech kim xabar bergani yo‘q. Ma’lumotlarimga ko‘ra, u shifoxonada qolmoqda (iyul oyi boshida Gilman fuqarolik shifoxonasining psixiatriya bo‘limiga o‘tkazilgan edi) va meni hamon uning oldiga kiritishmayapti", - degan u.
Keyinroq Gilmanning ozod etilganini Rossiya prezidentining maxsus vakili Kirill Dmitriyev va AQSh yetakchisi Donald Tramp ham tasdiqladi.
32 yoshli Robert Gilman Rossiyada hibsda saqlanayotgan kamida o‘n nafar amerikalikdan biridir. U 2022-yil yanvar oyida Rossiyaning Voronej shahrida politsiyachi bilan bo‘lgan mojarodan so‘ng qo‘lga olingan. Rossiya hukumati uni politsiya xodimiga hujum qilishda ayblagan. Dastlab u 4,5 yil qamoq jazosiga hukm qilingan. Keyinchalik unga nisbatan axloq tuzatish muassasasi xodimlariga hujum qilishda yangi ayblovlar paydo bo‘lgan va umumiy jazo taxminan 10 yilga oshirilgan.