Ronalduning nikohi haqidagi mish-mishlar sabab 2 mingdan ortiq muxlis begona to‘yga keldi (video)
**Ronalduning nikohi haqidagi mish-mishlar tufayli 2 mingdan ortiq muxlis notanish juftlikning to‘yiga keldi (video)**
O‘tgan shanba, 8-avgust kuni Krishtianu Ronalduning to‘yini kutgan ikki mingdan ortiq muxlis uning tug‘ilgan shahri – Madeyra orolidagi Funshal soborini o‘rab oldi. Biroq, o‘sha kuni cherkovda ikki nafar mahalliy fuqaro – Fabio Ramos va Fotima Nikol Kunya Teysheyra nikohdan o‘tayotgan edi.
8-avgust kuni ertalab tabloidlar Ronaldu va uning sevgilisi Jorjina Rodrigesning shu yerda turmush qurishi haqida yolg‘on xabarlar tarqatganidan so‘ng, sobor oldida katta olomon to‘plandi. Mahalliy OAVning yozishicha, juftlik to‘y bazmi uchun sobor yaqinidagi besh yulduzli Savoy Palace mehmonxonasini ham band qilib qo‘ygan.
Ammo muxlislar futbolchining emas, balki Fabio Ramos va Fotima Nikol Kunya Teysheyralarning nikoh marosimiga tashrif buyurdi. Yosh kelin-kuyov qarindoshlari va do‘stlari bilan birga nikoh o‘qiladigan soborga kirish uchun olomonni yorib o‘tishga majbur bo‘ldi.
Mehmonlardan biri shunday dedi: “Bu aqlga sig‘maydi. Nega hamma Fabioni Krishtianu Ronaldu deb o‘ylayapti? Kelin bu tartibsizlik to‘yini buzib qo‘yishidan qo‘rqib, juda xafa bo‘lyapti”.
Funshal sobori ruhoniysi Markos Gonsalves o‘sha kuni boshqa marosimlar rejalashtirilmaganini tasdiqladi: “Bugun bu yerda bo‘lib o‘tadigan yagona nikoh marosimi shu. Menda Krishtianu Ronaldu uchun buyurtma yo‘q”.
Ronalduning o‘zi esa bu voqeaga munosabat bildirib, ijtimoiy tarmoqlardagi nikoh marosimi videosi ostida kulayotgan smayliklar qoldirdi.
Eslatib o‘tamiz, Ronaldu va Rodriges 2016-yildan beri birga bo‘lib, besh nafar farzandni tarbiyalaydi: kichik Krishtianu, surrogat onadan tug‘ilgan egizaklar Yeva va Mateo, hamda ikki qizi — Alana Martina va Bella Esmeralda. Juftlik o‘tgan yilning avgust oyida unashtirilganini e’lon qilgandi. O‘shanda Jorjina Rodriges hashamatli nikoh uzugini ko‘rsatib, Krishtianuga rozilik berganini ma’lum qilgandi. Shundan so‘ng futbolchi qaylig‘ini bir necha bor qimmatbaho sovg‘alar — Porsche Taycan elektromobilidan tortib, eksklyuziv soatlar, dizaynerlik sumkalari va kiyimlari bilan xursand qilgandi.