Ronalduning goli “An-Nassr”ga g‘alaba keltirdi

Ronaldu goli "An-Nassr"ga g'alaba keltirdi

Saudiya Proligasining 2026/2027-yilgi mavsumining 4-turida "An-Nassr" va "At-Taavun" jamoalari o'rtasidagi bahs yakunlandi. Riyoddagi "Al-Avval Park" stadionida bo'lib o'tgan o'yin mezbonlarning 2:1 hisobidagi g'alabasi bilan yakunlandi.

Uchrashuvning 11-daqiqasida "At-Taavun" himoyachisi Bassam al-Hurayji hisobni ochdi. Birinchi bo'limga qo'shib berilgan vaqtda "An-Nassr" yarimhimoyachisi Samu Kosta hisobni tenglashtirdi. 50-daqiqada riyodliklar sardori Krishtianu Ronaldu mezbonlarga g'alaba keltirgan golni urdi.

Ayni paytda portugaliyalik hujumchi klublar miqyosida 832 ta, milliy terma jamoa safida esa 146 ta, umumiy hisobda esa 978 ta gol urgan.

Ronaldu 2023-yilning yanvaridan buyon "An-Nassr" tarkibida to'p tepmoqda. 41 yoshli futbolchining klub bilan amaldagi shartnomasi 2027-yil yozigacha mo'ljallangan. Transfermarkt portalidagi ma'lumotlarga ko'ra, futbolchining bozor qiymati 10 million yevroni tashkil etadi.

Saudiya chempionatidagi to'rt uchrashuvdan so'ng "An-Nassr" 12 ochko jamg'arib, turnir jadvalida birinchi o'rinda bormoqda. "At-Taavun" esa 2 ochko bilan 15-o'rinni egallab turibdi.

Keyingi turda "An-Nassr" 5-sentyabr kuni "Al-Ittihod"ga qarshi, "At-Taavun" esa shu kuni "Al-Fateh"ga qarshi maydonga tushadi.