Ronaldu faoliyatidagi 977-golini urgan bahsda “An-Nassr” yirik hisobda g‘alabaga erishdi

Ronaldu o‘z faoliyatidagi 977-golini kiritgan o‘yinda "An-Nassr" yirik g‘alabani qo‘lga kiritdi.

Saudiya Proligasining 2026/2027-yilgi mavsumining 2-turida "Ar-Riyod" va "An-Nassr" jamoalari o‘rtasidagi bahs yakunlandi. Ar-Riyoddagi "Shahzoda Faysal bin Fahd" stadionida bo‘lib o‘tgan ushbu uchrashuvda amaldagi chempion "An-Nassr" 4:0 hisobida ishonchli g‘alabaga erishdi.

O‘yinning 18-daqiqasida "An-Nassr" himoyachisi Abdulila al-Amri braziliyalik Gabriel Anjeloning uzatmasidan so‘ng hisobni ochdi. Birinchi bo‘lim yakunlanishiga oz qolganida, 45+1-daqiqada Anjelo o‘zi gol urib, hisobni 2:0 ko‘rinishiga keltirdi. Ikkinchi bo‘limda, 58-daqiqada portugaliyalik Joau Feliks jamoasining ustunligini yanada oshirdi. Uchrashuvning 84-daqiqasida esa hujumchi Krishtianu Ronaldu to‘rtinchi golni kiritdi. U ikkinchi bo‘limning 62-daqiqasida zaxiradan maydonga tushgan edi.

Shu tariqa, 2026/2027-yilgi mavsum Ronaldu uchun o‘zi faoliyat yuritayotgan mamlakat chempionatida gol urgan ketma-ket 25-mavsum bo‘ldi. U Portugaliya chempionatida "Sporting" safida debyut qilgan 2002/2003-yilgi mavsumdan buyon biror marta ham golsiz mavsum o‘tkazmagan.

Proliganing 1-turida "An-Nassr" "Al-Fateh"ni yirik hisobda mag‘lub etgan edi, biroq Ronaldu ushbu uchrashuvda ishtirok etmagan.

Ayni paytda portugaliyalik hujumchi klublar miqyosida 831 ta, milliy terma jamoa safida esa 146 ta, umumiy hisobda esa 977 ta gol urgan. Ronaldu 2023-yilning yanvaridan buyon "An-Nassr" tarkibida to‘p tepmoqda. 41 yoshli futbolchining klub bilan amaldagi shartnomasi 2027-yil yozigacha mo‘ljallangan. Transfermarkt portalidagi ma’lumotlarga ko‘ra, futbolchining bozor qiymati 10 million yevroni tashkil etadi.