Rojer Federer katta sportga qaytadimi?
Rojer Federer katta sportga qaytadimi?
"Katta dubulg‘a" turkumidagi turnirlarning 20 karra g‘olibi, shveysariyalik afsonaviy tennischi Rojer Federer Nyu-Yorkdagi "Artur Esh" kortiga qaytmoqda. 45 yoshli sobiq tennischi US Open turniri doirasida o‘tkaziladigan ko‘rgazmali bahsda ishtirok etadi. Biroq u professional sportga qaytmaydi.
2004–2008-yillarda ketma-ket besh marta AQSH ochiq chempionatida g‘alaba qozongan Federer oxirgi marta ushbu kortda 2019-yilda o‘ynagan edi. Matbuot anjumanida jurnalistlar undan opa-singil Uilyamslar (Venus va Serena) singari katta turnirlarga qaytish rejasi bor-yo‘qligi haqida so‘rashganida, Federer shunday javob berdi:
"Yo‘q, unday emas. Ushbu savolni berganingiz uchun rahmat. Kimdadir shunday fikr paydo bo‘lgan bo‘lsa, masalaga oydinlik kiritib olganimiz yaxshi bo‘ldi."
Federer 2021-yilgi Uimbldon chorak finalida Xubert Xurkachga imkoniyatni boy bergandan buyon birorta rasmiy yakkalik bahslarida kortga chiqmaganiga urg‘u berdi:
"Besh yildan beri yakkalik bahslarida o‘ynamadim. 25-avgust kungi uchrashuv qanday kechishini aniq bilmayman. Mavhumliklar ko‘p, ammo faoliyatimdagi eng go‘zal lahzalar o‘tgan "Artur Esh" kortiga qaytayotganimdan juda xursandman."
2019-yilgi chorak finaldagi mag‘lubiyatidan so‘ng u bir necha bor tizzasidan jarrohlik amaliyotini o‘tkazdi va faoliyatini yakunlashga majbur bo‘ldi.
"Tizzam ortiq bunga bardosh bera olmasdi, charchagan edi. Ruhiy jihatdan ham yana bir necha yil kutishga va sabr qilishga kuchim qolmagan edi", deydi Federer.
Nyu-Yorkdagi ushbu ko‘rgazmali turnirdan so‘ng Rojer Federer Rod-Aylend shtatining Nyuport shahriga yo‘l oladi. U yerda tennischini Xalqaro shon-shuhrat zaliga (International Tennis Hall of Fame) kirishi munosabati bilan maxsus tadbir bo‘lib o‘tadi.