Raqobat qo‘mitasi onlayn savdo bo‘yicha eng ko‘p shikoyat tushayotgan kompaniyalarni ma’lum qildi
Raqobat qo‘mitasi to‘qqiz oyda kelib tushgan 1,2 mingdan ortiq shikoyatni tahlil qilib, elektron tijoratdagi tizimli muammolarni ma’lum qildi. Murojaatlarning aksariyati Uzum va Alif xizmatlariga to‘g‘ri keladi. Nasiya tizimi, yetkazib berish va pullarni qaytarishdagi kamchiliklar asosiy e’tirozlardan bo‘ldi.
Raqobat qo‘mitasi onlayn savdo bo‘yicha eng ko‘p shikoyat kelayotgan kompaniyalarni e’lon qildi
2026-yilning o‘tgan davrida iste’molchilar huquqlarini himoya qilish yuzasidan kelib tushgan murojaatlarning 19,2 foizi yoki 1230 tasi elektron tijorat sohasiga to‘g‘ri kelgan, deya xabar bermoqda Raqobatni rivojlantirish va iste’molchilar huquqlarini himoya qilish qo‘mitasi.
Soha bo‘yicha jami murojaatlar soni (chakana savdo va umumiy ovqatlanish bilan birga) 6414 tani tashkil etgan. Murojaatlarning katta qismi yirik marketpleyslar hamda muddatli to‘lov (nasiya) xizmatlari hissasiga to‘g‘ri kelgan.
Qo‘mita tahlillari sohada bir qator tizimli muammolar borligini ko‘rsatgan. Xususan, elektron tijorat ishtirokchilarini identifikatsiya qilish va shaffoflikni ta’minlash, elektron shartnomalar hamda muddatli to‘lov tizimlarini takomillashtirish zarurligi qayd etilgan.
Shu bilan birga, tovarlarni yetkazib berish va pul mablag‘larini qaytarish mexanizmlaridagi kamchiliklar, onlayn platformalarning mas’uliyati hamda sudgacha nizolarni hal etishning raqamli tizimlari yetarli emasligi aniqlangan.
Arizalarning 57,2 foizi (704 ta) iste’molchilar foydasiga hal etilib, ularning huquqlari tiklangan. 36,8 foizi (453 ta) bo‘yicha huquqiy tushuntirishlar berilgan, 2,7 foizi (33 ta) esa vakolatli boshqa organlarga yuborilgan.
Idora ma’lumotiga ko‘ra, fuqarolar murojaatlari asosida yuzaga kelayotgan tizimli muammolarni bartaraf etish bo‘yicha tegishli takliflar ishlab chiqilmoqda.