Qurilish sohasidagi xodimlar uchun soatlik eng kam ish haqi miqdori oshiriladi
Qurilish sohasi boʻyicha prezidentning yangi qarori loyihasi ishlab chiqiladigan boʻldi. Unda qurilish sohasida pudrat va loyihalash tashkilotlarining faoliyatini ragʻbatlantirish, shuningdek, qurilish sohasidagi xodimlar uchun soatlik eng kam ish haqi miqdorini oshirish hamda barcha hududlardagi miqdorini tenglashtirish nazarda tutiladi.
Qurilish sohasi xodimlari uchun soatlik minimal ish haqi miqdori oshiriladi.
Prezident farmoni bilan, davlat rahbarining tadbirkorlar bilan ochiq muloqotida belgilangan vazifalarni amalga oshirish choralari tasdiqlandi.
Farmonga koʻra, 2027-yil yanvariga qadar qurilish sohasida pudrat va loyihalash tashkilotlarining faoliyatini ragʻbatlantirish hamda rivojlantirishning yangi mexanizmlarini joriy etish chora-tadbirlari toʻgʻrisida prezident qarori loyihasi ishlab chiqiladi.
Ushbu loyihada quyidagilar koʻzda tutiladi:
* Qurilish sohasida pudrat va loyihalash tashkilotlarining faoliyatini ragʻbatlantirish.
* Qurilish sohasidagi xodimlar uchun soatlik eng kam ish haqi miqdorini oshirish va barcha hududlardagi miqdorini tenglashtirish.
* Davlat byudjeti mablagʻlari hisobidan amalga oshiriladigan qurilish-montaj ishlarining smeta qiymatida pudrat tashkilotlarining rejali foydasi miqdorini 7 foizgacha etib belgilash.
* Loyihalash ishlarini moliyalashtirish hajmini obyektning murakkablik darajasi va oʻziga xos xususiyatlaridan kelib chiqqan holda takomillashtirish.
* Muhandislik kommunikatsiya infratuzilmasi uchun yigʻimlar boʻyicha avans toʻlovini 20 foizdan 5 foizga tushirish.
Qaror loyihasi 2027-yil yanvar oyida tayyor boʻlishi kerak.