Qurilish sohasidagi qonunbuzarliklar uchun jazolar kuchaytirildi
Oʻzbekistonda koʻp kvartirali uylarni ruxsatnomasiz qurish maʼmuriy jazo qoʻllanilganidan keyin yana sodir etilsa, uch yildan besh yilgacha ozodlikdan mahrum qilish bilan jazolanadi. Shaharsozlik qonunchiligini buzish odam oʻlimiga yoki boshqa ogʻir oqibatlarga sabab boʻlsa, besh yildan yetti yilgacha qamoq jazosi belgilandi.
Qurilish sohasidagi qonunbuzarliklar uchun javobgarlik kuchaytirildi
2026-yil 28-sentabrdagi OʻRQ-1179-son qonun bilan qurilish sohasida davlat nazorati va boshqaruvini takomillashtirishga qaratilgan oʻzgartish va qoʻshimchalar kiritildi.
«Litsenziyalash, ruxsat berish va xabardor qilish tartib-taomillari toʻgʻrisida»gi qonunga kiritilgan oʻzgartishlarga muvofiq, qurilish-montaj ishlarini boshlash uchun qurilish va uy-joy kommunal xoʻjaligi sohasida nazorat qilish hududiy inspeksiyalaridan ruxsatnoma olish talab etiladi.
Jinoyat kodeksiga kiritilgan oʻzgartishlar koʻp kvartirali uylarni mazkur inspeksiyalar ruxsatnomasisiz qurish uchun javobgarlikni belgilaydi. Bunday harakat uchun maʼmuriy jazo qoʻllanilganidan keyin qonunbuzarlik takroran sodir etilsa, uch yildan besh yilgacha ozodlikdan mahrum qilish jazosi tayinlanadi.
Shuningdek, shaharsozlik toʻgʻrisidagi qonunchilikni buzish odam oʻlishiga yoxud boshqa ogʻir oqibatlarga olib kelsa, besh yildan yetti yilgacha ozodlikdan mahrum qilish bilan jazolanadi.
Qonun rasmiy eʼlon qilingan kundan eʼtiboran uch oy oʻtgach kuchga kiradi.