Qozog‘iston O‘zbekistonga olib boruvchi yangi temiryo‘l qurilishini yil oxirigacha yakunlamoqchi
Qozog‘iston Darbaza — Maqtaaral temiryo‘l liniyasi qurilishini yil oxirigacha yakunlamoqchi. Bu liniya O‘zbekiston tomon qo‘shimcha yo‘nalish yaratadi hamda haddan tashqari tirband bo‘lgan Sariag‘ash — Toshkent uchastkasidagi yuklamani kamaytiradi. Chekka hududdagi chegarada yangi o‘tkazish punktini ochish ham ko‘zda tutilmoqda.
Qozog‘iston O‘zbekistonga olib boruvchi yangi temiryo‘l qurilishini yil oxirigacha yakunlamoqchi
Qozog‘istonda uzunligi 127,6 kilometr bo‘lgan Darbaza — Maqtaaral temiryo‘l liniyasidagi qurilish ishlari yakunlanish arafasida. Mamlakat Transport vazirligi ma’lumotiga ko‘ra, ishchi harakatni 2026-yil oxirigacha yo‘lga qo‘yish rejalashtirilgan.
Mazkur yangi uchastka Qozog‘iston uchun O‘zbekiston bilan qo‘shimcha yo‘nalish yaratish, tig‘iz Sariag‘ash — Toshkent uchastkasidagi yuklamani kamaytirish hamda mintaqadagi tranzit tashuvlar salohiyatini kengaytirishga xizmat qiladi.
Darbaza — Maqtaaral liniyasi qurilishi 2023-yil noyabr oyining oxirida boshlangan edi.
Loyiha qiymati 545 million dollarga baholangan. Uning doirasida ikki davlat chegarasida “Sirdaryo” temiryo‘l bekatiga chiqadigan yangi o‘tkazish punktini ochish ko‘zda tutilgan.
Aprel oyida Qozog‘iston bosh vaziri o‘rinbosari Serik Jumangarin transport koridorlari, jumladan, Sariag‘ash — Toshkent yo‘nalishidagi haddan tashqari tirbandlik Qozog‘iston va O‘zbekiston o‘rtasidagi tovar ayirboshlash hajmining o‘sishiga to‘sqinlik qilayotganini aytgandi.
Uning hisob-kitobiga ko‘ra, yangi temiryo‘l uchastkasi 20 million tonnagacha yuk tashish imkoniyatiga ega bo‘ladi.