Qozog‘iston Isroilga 500 ming tonna bug‘doy yetkazib bermoqchi
Mahsulotlar Ozarbayjon va Gruziyadan o‘tuvchi transport yo‘lagi yoki Boltiq dengizi portlari orqali yetkazib berilishi mumkin.
Qozog‘iston Isroilga 500 ming tonnagacha bug‘doy yuborishni rejalashtirmoqda.
Qozog‘iston Isroilga 500 ming tonna bug‘doy yetkazib berish imkoniyatini ko‘rib chiqmoqda. Mahsulotlar Ozarbayjon va Gruziya orqali o‘tadigan transport yo‘lagi yoki Boltiq dengizi portlari orqali jo‘natilishi mumkin. Bu tashabbus Quddusda o‘tkazilgan Savdo-iqtisodiy hamkorlik bo‘yicha hukumatlararo komissiya yig‘ilishida ilgari surilgan. Taklifni “Oziq-ovqat korporatsiyasi” boshqaruvi raisi o‘rinbosari Samat Tenbayev bildirgan.
Qozog‘iston tomoni Isroil bozorining ehtiyojlarini inobatga olib, 200 ming tonnadan 500 ming tonnagacha bug‘doy va boshqa qishloq xo‘jaligi mahsulotlarini yetkazib berish bo‘yicha uzoq muddatli shartnomalar tuzishga tayyorligini bildirgan.
Qishloq xo‘jaligi vazirligi ma’lumotiga ko‘ra, Qozog‘iston mahsulotlari dunyoning 80 dan ortiq mamlakatiga, jumladan Yevropa, Shimoliy Afrika, Yaqin Sharq va Janubi-Sharqiy Osiyo davlatlariga eksport qilinadi. Oktyabr oxirida vazirlik Qozog‘iston fermerlari yig‘im-terim yakunlariga ko‘ra 24,3 million tonna g‘alla yetishtirganini ma’lum qildi. Bu ko‘rsatkich o‘tgan yilgidan 10 foizga kam.
Ma’lumot uchun, 2025-yilda O‘zbekistonga 8 ta xorijiy davlatdan qiymati 124,6 million dollar bo‘lgan 422,6 ming tonna bug‘doy uni import qilingan. Eng yirik yetkazib beruvchi Qozog‘iston bo‘lib, 399,8 ming tonna mahsulot yuborgan. Keyingi o‘rinlarda Rossiya va Tojikiston turadi — mos ravishda 22,1 ming va 425 tonna.