Qorindagi yog‘ yurak-qon tomir kasalliklaridan darak beradi — tadqiqot

Qorindagi yog‘ning yurak-qon tomir kasalliklari bilan bog‘liqligi tadqiqotda aniqlandi.

Olimlar 20 yil davomida 250 mingdan ortiq kishini kuzatib, bel o‘lchami yurak xastaligi xavfini tana massasi indeksidan (TMI) ko‘ra aniqroq ko‘rsatishi mumkinligini aniqladilar. Tadqiqotda yurak xuruji, insult va yurak yetishmovchiligi kabi kasalliklar o‘rganildi. TMI me’yorida bo‘lsa ham, beli katta odamlarda yurak kasalligi xavfi yuqoriroq ekani ma’lum bo‘ldi.

Mutaxassislarning ta’kidlashicha, TMI tanadagi yog‘ miqdori yoki uning qayerda to‘planganini ko‘rsatmaydi. Ayniqsa, qorin va ichki a’zolar atrofidagi yog‘ qon bosimi, qondagi shakar va xolesterin miqdorini oshirishi mumkin.

**Bel o‘lchami qancha bo‘lsa, xavf yuqori hisoblanadi?**

Ayollarda bel aylanasi taxminan 89 santimetrdan, bel-son nisbati esa 0,85 dan yuqori bo‘lsa, bu ko‘rsatkichlar yuqori hisoblanadi. Erkaklarda esa bu chegaralar taxminan 102 santimetr va bel-son nisbati 0,90 dan yuqori bo‘lishi bilan belgilanadi.

Agar ko‘rsatkichlaringiz ushbu chegaralardan yuqori bo‘lsa, yurak-qon tomir kasalliklari xavfini baholash uchun shifokor bilan maslahatlashish tavsiya etiladi.

Tara Narulaning so‘zlariga ko‘ra, buni uy sharoitida ham qilish mumkin. Buning uchun kiyimsiz yoki yupqa kiyimda metrdan foydalaning. Belni uning eng keng yoki yuqori qismidan, sonni esa eng keng joyidan o‘lchang. Keyin bel o‘lchamini son o‘lchamiga bo‘ling.

Mutaxassislar tadqiqot natijalari tibbiyot amaliyotida muhim ahamiyatga ega bo‘lishi mumkinligini ta’kidlamoqda. Chunki bel ko‘rsatkichlarini hisobga olish orqali TMI ko‘rsatkichidan kelib chiqib baholanganidan yuqori yoki past yurak-qon tomir xavfiga ega odamlarni aniqlash osonlashishi mumkin.