Qirg‘izistonlik sobiq amaldor Toshkentda to‘y qildi
Qirg‘izistonlik sobiq amaldor Toshkentda to‘y o‘tkazdi
30-avgust kuni Toshkentdagi Marriott Hotel Tashkent mehmonxonasida Qirg‘iziston bojxona xizmati sobiq raisi o‘rinbosari Rayimbek Matraimovning o‘g‘li Aymen Matraimovning to‘yi bo‘lib o‘tdi.
To‘y marosimida Qirg‘izistonda taniqli siyosatchilar, jamoat arboblari va tadbirkorlar qatnashgan. Jumladan, Jogorku Keneshning sobiq deputatlari Jusupbek Korgonbay, Elmirza Satibaldiyev va Ibrohim Junusov, shuningdek, shifokor Sabirbek Jumabekov hamda tadbirkor Asqar Salimbekov mehmonlar orasida bo‘lgan.
Tadbirda rossiyalik xonandalar Lyusya Chebotina va Filipp Kirkorov, shuningdek, qozog‘istonlik xonanda Raim ham sahnaga chiqqan.
“PolitKlinika” ma’lumotiga ko‘ra, Aymen Matraimovning turmush o‘rtog‘i Samira Qozog‘istonning neft sohasidagi taniqli tadbirkori Jaqip Marabayevning nabirasi. U Leyla Soltanbayevaning qizi.
Soltanbayeva “Semurg Invest” holdingida korporativ direktor lavozimida ishlaydi. Nashr yozishicha, ushbu holding Marabayevlar oilasi bilan bog‘liq bo‘lib, infratuzilma, transport-logistika, qurilish va investitsiya loyihalari bilan shug‘ullanadi.
Kompaniyaning asosiy loyihalaridan biri Qozog‘istonning Mang‘istov viloyatidagi Qurik portida joylashgan ko‘p funksiyali “Sarja” dengiz terminali hisoblanadi. Ochiq manbalarda “Semurg Invest” Quriq porti infratuzilmasini rivojlantirishda ishtirok etishi qayd etilgan. “Sarja” loyihasi esa Transkaspiy xalqaro transport yo‘nalishini rivojlantirish bilan bog‘liq.
Rayimbek Matraimov Qirg‘iziston Davlat bojxona xizmati raisining sobiq o‘rinbosari bo‘lib, Qirg‘iziston bojxonasidagi korrupsiya yuzasidan o‘tkazilgan bir qator jurnalistik surishtiruvlardan keyin keng jamoatchilikka tanilgan.
Surishtiruvlarda Matraimov va uning yaqinlari uchta yirik bojxona terminali ustidan nazorat hamda yuklarni noqonuniy olib o‘tish sxemalari bilan bog‘liqligi aniqlangan.
2020-yil oktyabrida Matraimov korrupsiya ishi bo‘yicha qo‘lga olingan. 2021-yil fevralida Bishkek shahrining Pervomay tumani sudi uni aybdor deb topgan. Hukm chiqarilishidan oldin u davlatga 2 milliard qirg‘iz somi miqdoridagi zararni qoplagan. Shundan so‘ng sud unga 260 ming som jarima belgilagan.
2024-yilda Matraimov yana tergovga tortilgan. Unga davlat chegarasini noqonuniy kesib o‘tish va bezorilik kabi moddalar bo‘yicha ayblovlar qo‘yilgan. U bir necha oy hibsda saqlangan.
2024-yil noyabrida Qirg‘iziston Milliy xavfsizlik davlat qo‘mitasi raisi Qamchibek Tashiyev Matraimov davlatga taxminan 200 million dollarga baholangan aktivlarini topshirganini ma’lum qilgan. Shundan so‘ng Matraimov tergov hibsxonasidan ozod etilgan.
Dekabr oyida sud uni bezorilik va davlat chegarasini noqonuniy kesib o‘tish moddalarida aybdor deb topib, 100 ming som jarimaga tortgan.