Qasos, muhabbat va sirli jinoyatlar: tomosha qilishga arziydigan 7 ta turk miniseriali (treyler)
Qasos, muhabbat va sirli jinoyatlar: tomosha qilishga arziydigan 7 ta turk miniseriali (treyler)
Turk seriallari faqat uzoq davom etadigan melodramalari bilan emas, balki qisqa formatda hikoya qilinadigan, mazmuni va aktyorlik mahorati bilan tomoshabinni jalb etadigan loyihalari bilan ham e’tibor qozonmoqda. Ayniqsa, so‘nggi yillarda bir necha qism yoki mavsumdan iborat mini-seriallar orqali murakkab oilaviy munosabatlar, sevgi, qasos, jinoyat va inson ruhiyatining turli jihatlari yoritilmoqda.
“Ertangi kun kelmaydigandek” (2024)
Jurnalist Xoqon odatda siyosat haqida yozadi, ammo bir kuni unga serial aktrisasi Manoliyadan intervyu olish vazifasi tushadi. Bundan tashqari, odamlar uning rollaridan ko‘ra ko‘proq shov-shuvli shaxsiy hayotini muhokama qilishadi. Shu sababli restorandagi uchrashuvda Xoqon Manoliyaga deyarli mensimay munosabatda bo‘ladi. Biroq ilk to‘qnashuvdan keyin ular bir uyda tunab qoladi, barcha mavzularni muhokama qiladi va hatto o‘zaro rollarini almashadi.
Bu turk miniseriali Niderlandiyaning “Intervyu” filmiga asoslangan. Turkcha talqinda jurnalist obrazini “Muhtasham yuz yil” seriali bilan tanilgan Xalit Ergench ijro etgan.
“Istanbulda uchrashdik”
Dindor Maryam farrosh bo‘lib ishlaydi va sababsiz hushidan ketishlari sabab psixiatr Perining qabuliga qatnay boshlaydi. Peri o‘z mijozidan butunlay boshqacha hayot kechiradi, shu bois ularning dunyoqarashlari keskin farq qiladi. Shu bilan birga, Maryam bilan bog‘liq boshqa odamlar: uning zolim akasi Yosin va depressiyadan aziyat chekayotgan xotini Ruhiya, psixiatr Gulbin va uning dindor singlisi hamda boshqalar haqida ham hikoya qilinadi.
Serial bir shaharda, aniqrog‘i Istanbulda butunlay boshqa olamlarga mansub odamlarning qanday yonma-yon yashashini ko‘rsatadi. Bu Turkiya aholisi va ularning turmush tarzi naqadar rang-barang ekanini ta’kidlaydi.
“O‘qituvchi”
Turk litseylaridan birida fojia yuz beradi: suv sporti bilan shug‘ullangan iqtidorli o‘quvchi qiz o‘z joniga qasd qiladi. Bunga uning go‘yoki doping iste’mol qilayotgani aks etgan soxta video sabab bo‘ladi. Fizika o‘qituvchisi Akif Erdem ushbu rolik muallifini aniqlashga urinadi, biroq buni radikal usulda amalga oshiradi. U butun sinfni garovga oladi, xonada bomba borligini aytadi va o‘quvchi qizning o‘limiga kim sababchi ekanini tan olishni talab qiladi.
“O‘qituvchi” — bir yil avval namoyish etilgan “3-A sinf, shu paytdan boshlab siz garovdasiz” nomli yapon serialining remeyki. Biroq turkcha talqin ancha zulumkor chiqqan: bosh qahramon g‘ayritabiiy va ekssentrik o‘qituvchidan qat’iyatli va qattiqqo‘l insonga aylangan.
“Sevgi 101”
1990-yillarning oxirida Istanbuldagi litseylarning birida to‘rt o‘quvchi — Sinan, Eda, Usmon va Keremni o‘qishdan chetlatishmoqchi bo‘lishadi. Biroq ularni mehribon o‘qituvchisi Burju himoya qiladi. Ko‘p o‘tmay, yigit-qizlar o‘qituvchisining ishdan bo‘shab, boshqa shaharga ko‘chib ketishni rejalashtirayotganini bilib qolishadi. Shunda o‘smirlar bir reja tuzishadi: uni yangi jismoniy tarbiya o‘qituvchisi Kamol bilan tanishtirib qo‘yish kerak. Lekin negadir qahramonlar bir-biriga ko‘ngil qo‘yishni istashmaydi.
Turk mini-seriali o‘ziga xos tarzda ishlangan: unda qahramonlarning maktab yillari va ularning ulg‘aygan paytdagi hozirgi hayotidan lavhalar parallel ravishda hikoya qilinadi. Voqealar nafaqat o‘qituvchining shaxsiy hayotini yo‘lga qo‘yishga urinishlar, balki ilk muhabbatni boshdan kechirayotgan va kelajak haqida o‘ylay boshlagan yoshlarning kechinmalariga ham bag‘ishlangan.
“Fatma”
Farrosh bo‘lib ishlaydigan Fotimaning o‘g‘li vafot etadi, yaqinda qamoqdan chiqqan eri esa g‘oyib bo‘ladi. Ayol bu ishni o‘zi tergov qilishga qaror qiladi va tasodifan qotillik sodir etib qo‘yadi. U o‘zining ko‘zga tashlanmaydigan mavqeyidan foydalanib, yo‘liga to‘g‘anoq bo‘layotgan odamlardan birma-bir qutula boshlaydi. Shu tariqa Fotima o‘tmishdagi xo‘rlik va jarohatlar uchun qasos oladi.
Serial g‘oyasi mualliflarda farrosh kabi “ko‘rinmas” kasblar haqidagi o‘y-xayollardan so‘ng paydo bo‘lgan. Ular syujetni bosh qahramonning bosqichma-bosqich o‘zgarishi haqidagi hikoyaga aylantirishga qaror qilishgan: yuvosh ayol seriyali qotilga aylanadi, biroq bu deyarli majburlikdan sodir bo‘ladi.
“Dilemma”
Jurnalist Neslihan Turxon ko‘rsatuvining jonli efirida jinoyatchilarni fosh qilishi bilan tanilgan. U vasvasalarga berilmaydi va doim haqiqatni izlaydi. Ammo qotillik qurboni bo‘lgan qizning jasadi topilgach, tergov Neslihanni o‘g‘liga olib chiqadi. Endi qahramon o‘z prinsiplari va farzandini himoya qilish istagi o‘rtasida tanlov qilishi kerak.
“Dilemma” Amazon Prime Video platformasida namoyish etilgan ilk turk mini-seriali bo‘ldi. Rejissyor Jon Ulkay bundan avval to‘liq metrajli filmlar ustida ishlagani uchun striming loyihasini ham kino formatiga yaqinroq uslubda suratga olgan.
“Vijdon so‘zi”
Qachonlardir Jihan Adabeyli o‘z xaloskoriga uning har qanday istagini bajo keltirishga va’da bergan edi. Oradan yillar o‘tib, o‘sha odam qizi Isroni himoya qilishni so‘rab unga murojaat qiladi. Jihan qizni oilasiga tegishli orolga olib ketadi va asta-sekin unga ko‘ngil qo‘yadi. Biroq Isra uchun boylik va intriga olami begona bo‘lib chiqadi.
Serial avvalo o‘zining vizual tasvirlari bilan e’tiborni tortadi. Loyiha uchun maxsus ulkan suratga olish maydoni yaratilib, u xayoliy hashamatli orolga aylantirilgan. Yana ham haqqoniy chiqishi uchun suratga olish ishlari Izmir va Kalem orolida ham olib borilgan.