Qashqadaryoda xavfli haydash aks etgan videodan soʻng haydovchilar topildi va jazolandi

1 soat oldin

Qashqadaryo viloyatining Gʻuzor tumanida toʻy marosimi vaqtida yoʻlda xavfli manyovrlar aks etgan videolar ijtimoiy tarmoqlarda tarqalganidan soʻng, avtomobil haydovchilari maʼmuriy javobgarlikka tortildi. Kadrlarda ayrim mashinalar davlat raqami belgilarisiz harakatlangani koʻringan.

Huquq-tartibot idoralari xodimlari haydovchilarning shaxsini aniqlab, ular bilan profilaktik suhbatlar oʻtkazdi. Qoidabuzarlarga nisbatan Maʼmuriy javobgarlik toʻgʻrisidagi kodeksning tegishli moddalari bilan maʼmuriy bayonnomalar rasmiylashtirildi.

IIV ushbu haydovchilarning qoʻpol qoidabuzarliklaridan jabr koʻrgan barchani 102 raqamiga yoki eng yaqin ichki ishlar organiga murojaat qilishga chaqirdi.

Avvalroq Toshkent viloyati Oʻrta Chirchiq tumanidagi «Mustaqillik» mahallasi aholisi A-373 yoʻlining 10-kilometridagi qayrilib olish joyi yopilganidan shikoyat qilgan edi. Buning oqibatida haydovchilar qariyb 7,3 kilometrlik qoʻshimcha aylanib oʻtish yoʻlini bosib oʻtishga majbur boʻlmoqda, shuningdek, aholi piyodalar uchun xavf-xatarlar mavjudligini ham koʻrsatib oʻtgan.