Qarshiliklardan soʻng Sidneydagi bahsli maʼlumotlar markazi rejasi bekor qilindi
«Project Mars» maʼlumotlar markazi ortida turgan koʻchmas mulk giganti — Goodman Group kompaniyasining maʼlum qilishicha, bu qaror «siyosat va tartibga solish muhitidagi» oʻzgarishlar tufayli qabul qilingan.
Sidneyda bahs-munozaralarga sabab boʻlgan maʼlumotlar markazini qurish rejalari faollarning kuchli qarshiligidan keyin bekor qilindi.
Avstraliyaning eng yirik koʻchmas mulk kompaniyasi boʻlmish Goodman Group Sidney chekkasidagi uylardan atigi bir necha metr masofada qurishni rejalashtirgan ushbu obʼyekt Leyn Kouv (Lane Cove) hududida joylashadigan, qiymati 1,2 milliard Avstraliya dollari (630 million funt sterling; 841 million AQSh dollari) boʻlgan va 90 megavatt quvvatga ega «Mars loyihasi» (Project Mars) deb nomlangan majmua boʻlishi kerak edi.
Mahalliy rejalashtirish organiga yoʻllagan maktubida kompaniya oʻz arizasini qaytarib olayotganini tasdiqladi. Bu qaror mahalliy aholi va faollarning davomli qarshiligidan soʻng qabul qilindi.
Bu ixtilof Avstraliyada maʼlumotlar markazlarining oʻrni xususidagi keng koʻlamli munozaralarni aks ettiradi.
Soʻnggi yillarda generativ sunʼiy intellektdan foydalanish kengaygani sari maʼlumotlar markazlariga boʻlgan talab keskin ortdi va Avstraliya oʻzining moʻl-koʻl toza energiyasi, tabiiy gaz zaxiralari va yer maydonlari bilan ularni qurish boʻyicha global markazga aylandi.
Biroq, hukumat global sunʼiy intellekt kompaniyalaridan investitsiyalarni jalb qilishga intilayotgan bir paytda, ushbu markazlarning suv va energiya taʼminotiga katta yuklama olib kelishi, shuningdek, mahalliy aholi hayotiga xalaqit berishi sababli kuchli qarshiliklar ham yuzaga kelmoqda.
Leyn Kouvdagi eng yaqin uydan taxminan 20 metr masofada qurilishi kerak boʻlgan «Mars loyihasi» boʻyicha jamoatchilik muhokamasi davomida 374 ta fikr-mulohaza kelib tushgan boʻlib, ulardan faqat toʻqqiztasi loyihani qoʻllab-quvvatlagan.
Yangi Janubiy Uels Rejalashtirish departamentiga yoʻllagan maktubida Goodman Group 2025 yil mart oyida rejalashtirish jarayoni boshlanganidan beri «keng koʻlamli texnik tadqiqotlar, manfaatdor tomonlar bilan hamkorlik va jamoatchilik maslahatlashuvlarini amalga oshirganini» maʼlum qildi.
«Ushbu davr mobaynida yirik hajmdagi maʼlumotlar markazlarini rivojlantirish boʻyicha siyosiy va tartibga soluvchi muhit sezilarli darajada oʻzgardi», — deyiladi xabarda.
Kompaniya «mahalliy aholining fikr-mulohazalari» bilan bir qatorda «ushbu oʻzgarishlarni diqqat bilan koʻrib chiqqanini» va loyihani davom ettirmaslikka qaror qilganini bildirdi.
Goodman Group kompaniyasining ushbu qarori Yangi Janubiy Uels hukumati oʻtgan oyda maʼlumotlar markazlari uchun tezlashtirilgan dastur joriy etilishini eʼlon qilganidan keyin qabul qilindi.
Ushbu dasturga koʻra, agar takliflar standart talablariga javob bersa va qoʻshimcha suv hamda energiya taʼminotini moliyalashtirishga yordam bersa, ular 75 kun ichida koʻrib chiqilishi mumkin.
Yangi Janubiy Uels Qonunchilik assambleyasining Leyn Kouvdan saylangan aʼzosi Entoni Roberts «Lane Cove Responsible Planning Group»ning Facebook sahifasida qoldirgan postida buni «Leyn Kouv Vest aholisi uchun ulkan gʻalaba» deb atadi.
«Bu bizning jamoamiz uchun sogʻlom fikrning gʻalabasidir», — dedi u.
«Ushbu gʻalaba boshqa maʼlumotlar markazi developerlariga aniq signal beradi. Takliflarni taqdim etishdan oldin mos joylarni topish kerak.
Maʼlumotlar markazlari muhim rol oʻynaydi, ammo bunday hajm va miqyosdagi loyihalar tegishli joylarda joylashtirilishi va atrofdagi aholi manfaatlarini hisobga olgan holda rejalashtirilishi lozim».