Qariyb 1,5 milliard kilometrdan surat: sunʼiy yoʻldosh Saturnni tasvirga oldi
Vantor kompaniyasi oʻz sunʼiy yoʻldoshi Yer atrofidagi orbitadan olgan Saturn suratini eʼlon qildi. Kompaniya maʼlumotiga koʻra, tasvir qariyb 1,5 milliard kilometr masofadan olingan.
Qariyb 1,5 milliard kilometr uzoqlikdan olingan suratda sunʼiy yoʻldosh Saturnni tasvirga oldi
Avval Maxar Intelligence nomi bilan tanilgan kompaniya bu suratni X ijtimoiy tarmogʻida eʼlon qildi. Tasvirda Saturn hamda uning atrofidagi osmon qismida koʻrinib turgan yulduzlar aks etgan.
Vantor WorldView Space yoʻnalishini rivojlantirmoqda. Uning vazifasi Yer yuzasini emas, balki kosmosdagi obyektlarni suratga olishdan iborat. Kompaniya apparatlari orbitadan boshqa sunʼiy yoʻldoshlarni ham tasvirga olish imkoniyatini koʻrsatgan.
Jumladan, 2025-yil dekabrda WorldView-3 apparati nosoz Starlink sunʼiy yoʻldoshini 240 kilometr masofadan suratga olgan.
2026-yil aprelda esa WorldView Legion 4 sunʼiy yoʻldoshi «Xabbl» kosmik teleskopini taxminan 61,8 kilometr masofadan tasvirga tushirgan. Suratda bir pikselga qariyb toʻrt santimetr toʻgʻri kelgani sababli teleskopning silindrsimon korpusi, yaltiroq issiqlik himoya qoplamasi, ochilgan quyosh panellari va old qismidagi ochiq optik tuynugi koʻringan.
Vantor maʼlumotiga koʻra, kompaniyaning yettita apparati 200–1000 kilometr balandlikdagi orbitalarda joylashgan obyektlarni suratga ola oladi. Bunday kuzatuvlar uchun eʼlon qilingan eng yuqori tasvir aniqligi 2,5 santimetrgacha yetadi. Bu koʻrsatkich Saturn suratiga emas, orbitadagi obyektlarni yaqin masofadan tasvirga olish imkoniyatiga taalluqli.
Saturnning yangi surati esa kompaniya sunʼiy yoʻldoshlari ancha uzoqdagi osmon jismlarini ham kuzata olishini namoyish etgan.