Qarib qolgan kuyov: Burak O‘zchivit “Quyosh chiqadigan joy” serialidagi roli uchun tanqidlarga sabab bo‘ldi

Qarib qolgan kuyov: Burak O‘zchivit “Quyosh chiqadigan joy” serialidagi roli sabab tanqid ostida qoldi

Har bir mashhur turk aktyori faoliyati davomida kamida bir marta tanqidga duch keladi. Chunki hammaga birdek yoqishning iloji yo‘q. Ammo Burak O‘zchivitning “Quyosh chiqadigan joy” serialidagi roli aktyor uchun jiddiy sinovga aylangandek ko‘rinadi.

Dastlab serialda ishtirok etish bo‘yicha shartnoma imzolanishi ham mojaro bilan kechgan. Kenan obrazini aslida Ug‘ur Gunesh ijro etishi kerak edi. Biroq so‘nggi daqiqada OAV va ijtimoiy tarmoqlarda bosh qahramon rolini Burak O‘zchivit o‘ynashi haqida xabarlar tarqaldi. “Hukmdor Usmon” serialidagi aktyorning hamkasbi esa ijtimoiy tarmoqdagi sahifasida mashhur aktyor shunchaki o‘z xohishi bilan uning loyihadagi o‘rnini “tortib olgani”ga nozik ishora qildi.

Mojaro keyinroq bartaraf etildi va bu taxminni tasdiqlovchi dalillar topilmadi. Ammo bu Burak O‘zchivit faoliyatidagi shunga o‘xshash yagona holat emas. Masalan, “Hukmdor Usmon” serialida u avvalgi tarixiy loyiha — “Tirilish: Ertug‘rul”da bosh rolni ijro etgan Engin Altanning serialda ko‘rinishini istamagan. Shu sababli aktyorni almashtirishga to‘g‘ri kelgani aytiladi.

Biroq hozir gap o‘tgan yillardagi mojarolar haqida emas, balki Burakning ayni paytda olayotgan tanqidlari haqida ketmoqda. Serialning ilk qismi namoyish etilgach, tanqidchilar turk aktyori Sibel Tashchio‘g‘lu ijro etgan qahramonning o‘g‘liga mutlaqo o‘xshamasligini ta’kidladi. Ularning fikricha, ikkalasi kadrda tengdoshdek ko‘rinadi.

Muxlislarning e’tirozini tushunsa bo‘ladi: “Qizil sharbat” seriali yulduzi Sibel Tashchiog‘lu hamkasbidan bor-yo‘g‘i 9 yosh katta. Shu sababli u Burakka ona rolida unchalik mos kelmaydi. Burakni yoshroq ko‘rsatishga qanchalik urinilmasin, Sibelni “qaritish”ga esa hech kim urinayotganga o‘xshamaydi.

Serial syujetiga ko‘ra, bosh qahramon taxminan 27 yoshda bo‘lishi kerak. Ammo tomoshabinlar fikricha, Burak O‘zchivit taqiqlangan, onasi qarshi bo‘lgan sevgisi yo‘lida qiynalayotgan yosh kuyovga emas, hayotda o‘z o‘rnini topgan, ikki farzandning otasiga o‘xshaydi.

Tanqidlar nafaqat aktyorning tashqi ko‘rinishidagi nomuvofiqlikka, balki uning ijrosiga ham qaratildi. Tomoshabinlar fikricha, Kenan va Leyla o‘rtasidagi munosabatlar ekranda ishonarli aks etmagan. Ayrimlar esa qahramonlar orasida hissiy yaqinlik umuman sezilmaganini aytmoqda.

Ko‘pchilik Burak O‘zchivit rolni juda sust ijro etayotganini bildirgan. U qahramonning his-tuyg‘ularini tomoshabinga yetkaza olmayapti, go‘yo shunchaki matnni o‘qib, kerakli mimikani ko‘rsatayotgandek.

Tomoshabinlardan ayrimlari shunday fikr bildirgan:

“Uning yangi serialidan parchalarni ko‘rdim, haqiqatan ham juda yomon ijro etyapti”.

“Serial juda jo‘n, Burak esa unda masxarabozga o‘xshaydi. Semirib ketgan, yoshi katta kuyov”.

Burak O‘zchivit ham bu tanqidlarga javobsiz qolmadi. U ijtimoiy tarmoqdagi sahifasiga sun’iy intellekt yordamida yaratilgan tog‘ echkisi suratini joylashtirdi. Bu bilan nimani nazarda tutgani esa muxlislar uchun hanuz jumboq bo‘lib qolmoqda.

Turkiyalik aktyor Janer Shahin hamkasbi Burakni himoya qildi.

“Men bu aktyorning ijrosi haqidagi tanqidlarni doim ko‘rib turaman. Ammo gap endi shunchaki tanqidda emas, u masxara va haqoratgacha yetib bordi...”

Biroq Janerning hamkasbini himoya qilishi xeyterlarga yoqmadi. Ular aktyorni Burak O‘zchivitning yana bir bor “daxlsiz” ekaniga ishora qilganlikda va muhokama qilinayotgan mavzu orqali omma e’tiborini o‘ziga qaratishga uringanlikda ayblashdi.

“Quyosh chiqadigan joy” serialining dastlabki reytinglari yomon emas — Total auditoriyasida 4,66 foiz. Biroq loyiha tomoshabinlarni uzoq muddat ushlab qola oladimi yoki yo‘qmi, hozircha noma’lum.