Puxta o‘ylangan jinoyat, mohir izquvar va kutilmagan yakun: Agata Kristi asarlariga asoslangan 5 ta detektiv serial

Puxta rejalashtirilgan jinoyatlar, mohir detektivlar va kutilmagan yakunlar: Agata Kristi asarlari asosidagi 5 ta detektiv serial

Detektiv janrining malikasi Agata Kristi o‘z o‘quvchilarini shunday murakkab syujetlarga tortadiki, har bir qahramon beixtiyor gumondorga aylanadi. Quyida ushbu adibaning asarlari asosida suratga olingan eng sara 5 ta serial jamlangan. Bu filmlardagi puxta o‘ylangan jinoyatlar, o‘tkir zehnli izquvarlar va kutilmagan tafsilotlar tomoshabinni sirli jinoyatni film qahramonlaridan ham oldinroq fosh etishga undaydi.

**1. “Hech kim qolmadi” (“И никого не стало” — “O‘nta negr bolasi” asari asosida)**

BBC telekanalining uch qismli miniseriali mashhur “O‘nta negr bolasi” romanining yangicha talqini asosida suratga olingan. Syujetdan bexabar bo‘lganlar uchun qisqacha eslatma: voqealar markazida odamlardan uzilib qolgan, kimsasiz orolga maxsus taklifnoma bilan kelgan o‘n nafar bir-biriga begona odam turadi. Uy egalari o‘rniga mehmonlarni xizmatchilar kutib oladi.

To‘satdan dabdabali tushlik paytida grammofon plastinkasi yangrab, unda barcha ishtirokchilarni jazoga tortilmagan qotillikda ayblashadi. Shundan so‘ng mehmonlar birin-ketin sirli ravishda vafot eta boshlaydi. Tirik qolganlar esa bularning ortida kim turganini aniqlashi kerak. Biroq ularning o‘zi ham o‘lim xavfi ostida bo‘ladi.

Serial asl nusxadan faqatgina kichik detallarda farq qiladi. Masalan, tushlik stolida mahalliy qabila odamlarining emas, balki askarchalarning haykalchalari ishlatilgan. Loyiha o‘zining og‘ir atmosferasi bilan ajralib turadi.

Aktyorlar tarkibidan Sem Nill, Eydan Terner, Charlz Dens va boshqalar o‘rin olgan. Rejissyor — Kreyg Viveyros, ssenariy muallifi — Sara Felps. Ushbu loyihani Stanislav Govoruxinning “O‘nta negr bolasi” nomli sovet filmi bilan solishtirish mumkin.

**2. “Ayblov guvohi” (“Svidetel obvineniya”)**

Ikki qismdan iborat bo‘lgan mazkur film voqealari keskin muhitda kechadi.

Filmda urushdan keyin Londonda boy ayol Emili Frenchning (Kim Ketroll) mulkini qo‘lga kiritish maqsadida uni o‘ldirganlikda ayblanayotgan Leonard Voulning (Billi Houl) sud jarayoni tasvirlanadi. U o‘zining begunohligini yosh hamrohi Romeyn (Andrea Rayzboro) isbotlay olishiga ishonadi. Unga advokat Jon Meyhyu (Tobi Jons) yordam beradi. Ushbu ikki qismli kartina 2017-yilda Broadcasting Press Guild Awards mukofotiga sazovor bo‘lgan.

**3. “Oq ot” (“Bledniy kon”)**

G‘ayritabiiy unsurlarga ega, xuddi shu nomdagi roman asosida suratga olingan ikki qismli film. Syujetga ko‘ra, sodir bo‘layotgan qotilliklar qora sehr bilan shug‘ullanuvchi ayollar bilan bog‘liq bo‘ladi. Antropolog Mark Isterbruk (Rufus Syuell) ismlar ro‘yxati va tushuntirib bo‘lmaydigan o‘limlar o‘rtasidagi bog‘liqlikni aniqlashga harakat qiladi.

“Oq ot” serialining aktyorlar tarkibida “Uzuklar hukmdori”ning aktyori Shon Bin hamda “Jentlmenlar”dagi Kaya Skodelario ishtirok etgan. Ssenariy detektiv janridan ko‘ra ko‘proq triller yo‘nalishiga moslashtirilgan bo‘lib, vizual jihatdan mistika va gotika uslubida ishlangan.

**4. “Begunohlik sinovi” (“Ispitaniye nevinovnostyu”)**

1954-yilning Rojdestvo oqshomida oilaviy qo‘rg‘onda Reychel Argayl o‘ldirib ketiladi. Jinoyatda uning asrab olgan o‘g‘li Jek (Entoni Boyl) ayblanadi. U begunoh ekanligini ta’kidlaydi, biroq u o‘n sakkiz oydan keyin qamoqxonada vafot etadi.

Keyinchalik shifokor Artur Kalgari (Lyuk Tredevey) paydo bo‘lib, marhum qotillik paytida boshqa joyda bo‘lganini isbotlovchi dalilni taqdim etadi. Shundan so‘ng oilaning tirik qolgan barcha a’zolari qaytadan gumon ostiga olinadi.

“Begunohlik sinovi” yuqori reytinglarni qo‘lga kiritgan. Tanqidchilar tomonidan loyihaning haddan tashqari qorong‘i muhitda ishlangani qayd etilgan. Kartina voqealari parallel ravishda turli chiziqlarda rivojlanadigan syujet va oilaviy dramalar toifasiga kiradi.

**5. “Nol sari” (“Po napravleniyu k nulyu”)**

BBC’ning ushbu adaptatsiyasi aktyorlar tarkibi bilan ajralib turadi. Loyihada “Adamslar oilasi” filmi yulduzi Anjelika Hyuston, Oliver Jekson-Koen va Mimi Kin rol ijro etgan.

Voqealar o‘tgan asrning 30-yillarida Angliyada bo‘lib o‘tadi. Tennischi Nevil Strenj va uning sobiq rafiqasi Odri ajrimdan keyin yozni Nevilning xolasi ledi Tressilianning qo‘rg‘onida o‘tkazishga qaror qilishadi. Nevilning yangi qaylig‘i ham o‘sha yerga keladi.

Shuningdek, uyda xizmatchi, badarg‘a qilingan amakivachcha va oilaviy advokat ham hozir bo‘ladi. Ko‘p o‘tmay uy bekasi o‘ldirib ketiladi. Tanqidchilarning fikriga ko‘ra, ushbu hikoya katta dramatik keskinlikka ega emas va ko‘proq ko‘ngilochar formatga mosdek. Filmda Angliyaning o‘sha davr liboslari va urf-odatlari aks ettirilgan.