Putin Armanistonni YEI va YEOII oʻrtasida tanlov qilishga chaqirdi
Rossiya prezidenti Vladimir Putin Armanistonning Yevropa Ittifoqiga aʼzo boʻlish jarayonini boshlashi amalda Yevrosiyo iqtisodiy ittifoqidan chiqishni anglatishini bildirdi. Armaniston bosh vaziri Nikol Pashinyan esa Yerevan YEOII doirasidagi majburiyatlarini buzmaganini taʼkidladi.
Putin Armanistonni Yevropa Ittifoqi (YI) va Yevrosiyo Iqtisodiy Ittifoqi (YEOII) oʻrtasida tanlov qilishga undadi.
Rossiya prezidenti Vladimir Putin va Armaniston bosh vaziri Nikol Pashinyan Bishkekda Shanxay Hamkorlik Tashkiloti sammiti doirasida uchrashishdi. Kremlning 1-sentabr kuni eʼlon qilingan muzokaralar stenogrammasiga koʻra, Armanistonning Yevropa Ittifoqiga aʼzo boʻlish rejalari asosiy muhokama mavzularidan biri boʻlgan.
Putin Armanistonning boshqa iqtisodiy tuzilmaga qoʻshilish jarayonini boshlashi YEOIIdan chiqishni anglatishini taʼkidladi, chunki bir vaqtning oʻzida ikkala tuzilmaga ham aʼzo boʻlish imkonsiz.
"Siz chiqish haqida eʼlon qilmaganingizni aytdingiz. Boshqa iqtisodiy tashkilotga aʼzo boʻlish jarayonini boshlash toʻgʻrisidagi qonunning qabul qilinishi amalda bizning tashkilotdan chiqish haqidagi bayonotni anglatadi. Chunki u yerda ham, bu yerda ham bir vaqtning oʻzida boʻlish mumkin emas", dedi Putin.
Rossiya prezidenti Armanistonda YI va YEOII masalasi boʻyicha referendum oʻtkazish taklifini yana bir bor ilgari surib, bu borada aholining fikrini soʻrash zarurligini taʼkidladi.
Pashinyan esa Armaniston Rossiya bilan ikki tomonlama shartnomalarni hamda YEOII doirasidagi huquqiy bazani tahlil qilganini bildirdi. Uning soʻzlariga koʻra, Yerevan Armanistonning Rossiya yoki YEOII oldidagi majburiyatlarini buzgan biror holatni aniqlamagan.
Pashinyan, shuningdek, 2025-yilda Yevropa integratsiyasiga oid qonun qabul qilinishi bilan Armaniston YI va YEOII oʻrtasida tanlov qilish boʻyicha referendum oʻtkazish gʻoyasidan amalda voz kechganini aytdi.
Armaniston bosh vaziri 24-avgust kuni mamlakat yaqin vaqt ichida Yevropa Ittifoqiga aʼzo boʻlish uchun ariza berish jarayonini boshlash niyatida ekanini maʼlum qilgan edi. Shundan soʻng Yevropa komissiyasi Armaniston hozir "Yevropa Ittifoqiga har qachongidan ham yaqinroq" ekanini bildirgan. Biroq Bryussel YIga aʼzo boʻlish aniq belgilangan va nomzod mamlakatning natijalariga asoslangan jarayon ekanini ham eslatgan.
Putin avval ham Yevropa Ittifoqi va Yevrosiyo Iqtisodiy Ittifoqiga bir vaqtning oʻzida aʼzo boʻlish mumkin emasligini taʼkidlab kelgan.
Rossiya va Armaniston oʻrtasidagi munosabatlarda soʻnggi vaqtlarda kelishmovchiliklar kuzatilmoqda. DW maʼlumotiga koʻra, Armanistondagi parlament saylovlari arafasida Moskva ayrim arman mahsulotlarining Rossiyaga olib kirilishini taqiqlagan.