President AI Award’ga arizalar qabul qilish muddati 15-avgustgacha uzaytirildi

**President AI Award tanloviga arizalar qabul qilish muddati 15-avgustgacha uzaytirildi**

Sun’iy intellekt (AI) asosida yaratilgan ishchi mahsulotga ega jamoalar uchun President AI Award 2026 tanloviga arizalar qabul qilish muddati 15-avgustga qadar uzaytirildi. Umumiy investitsiya jamg‘armasi 1 million dollarni tashkil etuvchi ushbu tanlov O‘zbekistonda AI-startaplarni qo‘llab-quvvatlashga qaratilgan.

**Tanlov shartlari va yo‘nalishlari**

Tanlovga faqatgina konsepsiya bosqichidagi loyihalar emas, balki ishlaydigan MVP (minimal hayotiy mahsulot)ga ega mahsulotlar qabul qilinadi. Loyihaning amalda namoyish etilishi va uning funksionalligi tasdiqlanishi talab etiladi.

Loyihalar quyidagi beshta asosiy yo‘nalish bo‘yicha qabul qilinadi:

* Davlat boshqaruvi

* Sanoat va tadbirkorlik

* Sog‘liqni saqlash va tibbiyot

* Ta’lim

* Yashil iqtisodiyot va agrotexnologiyalar

Tanlovda 18 yoshdan katta ishtirokchilardan tashkil topgan, 3 tadan 8 kishigacha bo‘lgan jamoalar ishtirok etishi mumkin.

**Ariza topshirish tartibi**

Arizaga loyihaning o‘zbek, rus va ingliz tillaridagi taqdimoti, uch daqiqagacha bo‘lgan videotaqdimot, ishlaydigan MVP havolasi hamda jamoa haqidagi ma’lumotlar ilova qilinishi shart.

**Akseleratsiya dasturi va g‘oliblarni aniqlash**

Dastlabki saralashdan o‘tgan 25 ta startap akseleratsiya dasturiga qabul qilinadi. Ushbu dastur doirasida jamoalar mentor va ekspertlar bilan hamkorlikda mahsulotlarini rivojlantiradi hamda investorlarga taqdimot qilishga tayyorlanadi.

Akseleratsiya yakunida startaplar o‘z ishlanmalarini Demo Day tadbirida namoyish etadi. Shundan so‘ng har bir yo‘nalish bo‘yicha uchtadan, jami 15 ta g‘olib aniqlanadi.

**Mukofotlar**

* Birinchi o‘rin sohiblariga 100 ming dollar

* Ikkinchi o‘rin egalariga 60 ming dollar

* Uchinchi o‘rin sohiblariga 40 ming dollar investitsiya ajratiladi.

Mablag‘lar IT Park Ventures tomonidan belgilangan KPI (asosiy samaradorlik ko‘rsatkichlari) bajarilishiga qarab ikki transhda taqdim etiladi.

Tanlovda ishtirok etish bepul. Arizalarni awards.gov.uz platformasi orqali 15-avgustgacha topshirish mumkin.

President AI Awardʼga oid yangiliklar va muhim e’lonlar @president_ai_award Telegram-kanalida berib boriladi.

Tanlovning media hamkori - The Tech, Entertainment hamkori - OQ mobil aloqa ilovasi.