Poundland egalari xaridor qidirmoqda, kompaniya qutqaruv muzokaralarini olib bormoqda
Rahbariyat jamoasi kompaniyani sotib olishga harakat qilmoqda, biroq kasaba uyushmasi chakana savdo tarmogʻi buning oʻrniga tashqi boshqaruv ostiga tushib qolishi mumkinligidan ogohlantirdi.
Poundland qutqaruv bitimini amalga oshirish maqsadida ehtimoliy xaridorlar bilan muzokaralar olib borayotganini tasdiqladi.
Biroq, doʻkon xodimlari kasaba uyushmasi agar boshqa xaridorlar topilmasa, riteyler bankrotlikni boshqarish (administratsiya) tartibiga tushib qolishi mumkinligi va bu minglab ish oʻrinlarini xavf ostiga qoʻyishi haqida ogohlantirdi. Usdaw bu "aʼzolarimiz uchun ofat" boʻlishini aytdi.
Poundland'ning Buyuk Britaniya va Irlandiya boʻylab 600 ga yaqin doʻkoni bor va unda 12 000 kishi mehnat qiladi.
Tarmoq xarajatlarning oshishi va raqobat kabi omillar tufayli bir necha yildan beri bosim ostida qolmoqda.
Oʻtgan yozda riteyler oʻzining sobiq egasi Pepco tomonidan AQShning Gordon Brothers investitsiya firmasiga 1 funt sterlingga sotilgan edi.
Vakilning aytishicha, hozirgi egalari xaridorlarni qidirmoqda, Poundland rahbariyati esa doʻkonlar tarmogʻini sotib olishni tashkillashtirishga harakat qilmoqda.
Poundland bosh direktori Barri Uilyams, kompaniya rahbariyati jamoasi va Pepco'ning amaldagi raisi Endi Bond bilan birgalikda, rahbariyat tomonidan biznesni sotib olish boʻyicha Irlandiyaning Martin Property Group koʻchmas mulk firmasi bilan hamkorlik qilmoqda.
Vakilning taʼkidlashicha, Martin Property Group boshqaruv jamoasining "maʼqul koʻrgan hamkori" hisoblanadi, ammo jamoa "biznes, hamkasblar va yetkazib beruvchilar uchun eng yaxshi natijani taʼminlay oladigan va allaqachon shakllanayotgan muvaffaqiyatli tiklanishga asoslana oladigan har qanday tomon bilan ishlaydi", deya qoʻshimcha qildi u.
Biroq Usdaw milliy ofitseri Balli Auluk, agar sotib olish muvaffaqiyatli chiqmasa, "biznes bankrotlikni boshqarish tartibiga oʻtib ketishi mumkinligidan chuqur xavotirlar" borligini aytdi.
"Biz rahbariyat tomonidan sotib olishga urinish boʻlganidan xabardormiz va bizga ularning takliflari rad etilayotgani aytilmoqda", deya qoʻshimcha qildi u.