Polshadagi bo‘lajak AQSH harbiy bazasiga Tramp nomi berilishi mumkin

Polshadagi bo‘lajak AQSH harbiy bazasi Tramp nomi bilan atalishi mumkin

Polsha prezidenti Karol Navrotskiy, agar mamlakat hududida AQSHning doimiy harbiy bazasi barpo etilsa, u Donald Tramp sharafiga Fort Trump deb nomlanishini bildirdi.

Baza ochilishiga Trampning o‘zi kelishi kutilmoqda

Karol Navrotskining aytishicha, loyihani tasdiqlash faqat vaqt masalasi xolos. U baza Trampning prezidentlik muddati yakunlanadigan 2029-yilgacha qurib bitkazilishiga umid qilmoqda.

“Amerika ma’muriyati hamda ikkala mamlakat hukumatlari ishlarni yakunlagach, o‘ylaymanki, prezident Tramp Fort Trump bazasining ochilishida shaxsan o‘zi qatnashadi”, dedi Polsha prezidenti.

Qayd etilishicha, qurilish boshlanishidan avval tomonlar qolgan tashkiliy va moliyaviy masalalarni hal qilib olishi lozim. Avgust oyida Polshada doimiy AQSH harbiy bazasini tashkil etish rejalashtirilayotgani haqida xabar berilgandi.

10 ming amerikalik harbiy va yangi reja

Hozir Polshada rotatsiya asosida qariyb 10 ming amerikalik harbiy joylashtirilgan. Navrotskiyga ko‘ra, agar Vashington Germaniyadagi harbiylari sonini kamaytirsa, Varshava ularning bir qismini o‘z hududida qabul qilishga tayyor.

Polshada AQSHning doimiy harbiy bazasini tashkil etish taklifi ilk bor 2018-yilda o‘sha paytdagi prezident Anjey Duda tomonidan ilgari surilgan. 2026-yil sentyabr oyida AQSH vakillari baza qurilishi mumkin bo‘lgan joylarni ko‘zdan kechirish uchun Polshaga tashrif buyurdi.

Ayni paytda, kuni kecha Tramp Grenlandiyada ikkita yirik harbiy baza qurilishi va u yerda AQSH harbiy ishtiroki oshirilishini ma’lum qildi. U Daniya va Grenlandiya bilan tuzilgan kelishuv Vashingtonga orol xavfsizligi ustidan doimiy nazorat o‘rnatish imkonini berishini ta’kidlamoqda.