Pokistonda masjid yaqinidagi portlash 16 kishining hayotiga zomin boʻldi
Pokistonning Kohat shahrida juma namozi vaqtida masjid yaqinida portlash sodir boʻldi. Natijada 16 kishi halok boʻldi, yana 56 kishi jarohatlandi. Portlash masjid yaqinida oʻra hosil qilgan, binoning tashqi qismiga shikast yetkazgan va devorning qulashiga sabab boʻlgan.
India Today nashrining politsiya va shifoxona vakillariga tayanib xabar berishicha, halok boʻlganlar orasida besh nafar politsiyachi va 11 nafar tinch aholi vakili bor. Jarohatlanganlar Kohat okrug shifoxonasiga yetkazilgan va u yerda favqulodda holat rejimi eʼlon qilingan.
Masjid Old Police Lines majmuasi ichida joylashgan. Politsiyaning dastlabki maʼlumotlariga koʻra, portlovchi moddalar bilan toʻldirilgan avtomobil majmua darvozasiga borib urilgan, shundan soʻng portlash sodir boʻlgan. Keyinchalik hududda otishma ovozlari ham eshitilgan.
Portlashdan soʻng qurollangan shaxslar politsiya majmuasi hududiga kirishga uringan, shundan soʻng ular va politsiya xodimlari oʻrtasida otishma boshlangan.
Voqea joyiga qutqaruvchilar yetib kelib, jabrlanganlarni evakuatsiya qilishni boshlagan. Politsiya va xavfsizlik kuchlari hududni oʻrab olgan, Kohat — Hangu yoʻlidagi harakat esa toʻsib qoʻyilgan.
Portlash yaqin atrofdagi bir nechta binolarga ham shikast yetkazgan. Mahalliy aholining xabar berishicha, portlash ovozi juda uzoq masofadan eshitilgan.
Hozircha hujum uchun javobgarlikni hech bir guruh oʻz zimmasiga olmadi. Mintaqada ISHID bilan aloqador mintaqaviy guruh, shuningdek, xavfsizlik kuchlariga muntazam ravishda hujumlar uyushtirib turadigan Pokistonning "Tehrik-i-Tolibon Pokiston" (TTP) harakati faoliyat yuritadi.
Hujum qoʻshni Hangu okrugida yoʻl chetiga oʻrnatilgan bomba portlatilganidan bir kun oʻtib sodir boʻldi. Oʻshanda xavfsizlik kuchlari karvoniga qilingan hujum natijasida olti nafar harbiy xizmatchi halok boʻlgan edi.
Portlashdan bir kun oldin Pokiston xavfsizlik kuchlari bir nechta hududlarda operatsiyalar oʻtkazib, rasmiylar TTP aʼzolari deb hisoblaydigan oʻn nafar jangari yoʻq qilinganini maʼlum qilgan edi.
Avvalroq, Xitoyning Tsindao portida Ocean Melody yuk kemasida yuz bergan yongʻin oqibatida kamida 20 kishi halok boʻlgan, yana besh kishi bedarak yoʻqolgan deb hisoblanayotgan edi. Besh nafar jabrlanuvchi shifoxonaga yotqizilgan, ularning ahvoli barqaror deb baholanmoqda.