Paxta, chorvachilik va go‘sht importi uchun yangi subsidiyalar ajratiladi
Jumladan, 2026-yil 1-oktyabrdan 2027-yil 1-iyunga qadar tadbirkorlarga sovutilgan mol va qo‘y go‘shti importida har bir
Paxta, chorvachilik va go‘sht importi uchun yangi subsidiyalar ajratiladi
Prezidentning 2026-yil 28-sentyabrdagi PQ–354-son qarori bilan agrar sohani moliyaviy qo‘llab-quvvatlash hamda tavakkalchiliklarni boshqarish tizimida bir qator yangi tartiblar joriy etildi. Sohada subsidiyalarni natijaga bog‘lash va sug‘urta mexanizmlarini kengaytirish nazarda tutilgan. Prezidentga taqdim etilgan ma’lumotlarga ko‘ra, 2026-yilda agrar sohada 29 yo‘nalish bo‘yicha 91 turdagi subsidiya uchun 2,7 trln so‘m mablag‘ ajratilishi ko‘zda tutilgan.
Qarorga ko‘ra, 2026-yil hosilida paxta xomashyosining har bir tonnasi uchun 500 ming so‘mdan subsidiya beriladi. Bunda 4 va 5-navli paxta ushbu tartibdan istisno qilinadi.
Shuningdek, 2026-yilda o‘ziga biriktirilgan yerlarda paxta yetishtirgan paxta-to‘qimachilik klasterlari hamda ular ta’sischi bo‘lgan korxonalarga har bir gektar uchun 1,5 mln so‘mdan subsidiya ajratiladi.
2027–2029 yillarda chorvachilik xo‘jaliklarida asosiy maydonlarda ozuqa ekinlari yetishtirilgan har bir gektar uchun yillik 500 ming so‘m subsidiya berilishi belgilandi. Bu Kosmik tadqiqotlar va texnologiyalar agentligi xulosasi asosida amalga oshiriladi.
Bundan tashqari, 2026-yil 1-oktyabrdan 2027-yil 1-iyungacha tadbirkorlarga sovutilgan mol va qo‘y go‘shti importida har bir kilogramm uchun 2,5 ming so‘mdan subsidiya to‘lanadi.
Yana bir yangilik — 2027-yil 1-yanvardan 2028-yil 1-yanvargacha suv tejovchi sug‘orish texnologiyalarini joriy etish xarajatlarining bir qismini qoplashda «Natijaviy subsidiya» tizimi sinov tariqasida joriy etiladi. Bunda subsidiya miqdori faqat qilingan xarajatga emas, balki hosildorlik, mahsulot sifati va boshqa natija ko‘rsatkichlariga ham bog‘lanadi.
Qaror bilan qishloq xo‘jaligini sug‘urtalashda ham rag‘batlantiruvchi mexanizmlar belgilandi. Uch yil davomida sug‘urta hodisasi kuzatilmagan xo‘jaliklarga to‘rtinchi yildan boshlab sug‘urta mukofoti bo‘yicha 10 foizdan 20 foizgacha chegirma beriladi. Shuningdek, sug‘urta mukofotlarining 3–5 foizi ogohlantiruvchi tadbirlar zaxirasiga yo‘naltiriladi.