Parij koʻchalarida norozilik namoyishlari tartibsizliklar va talonchiliklarga aylanib ketganidan keyin yongan mashinalar va singan oynalar qoldi
Butun mamlakat boʻylab oʻtgan norozilik namoyishlari zoʻravonlik va vandalizmga aylanib ketganidan soʻng, 1 800 ga yaqin odam hibsga olindi.
Parijda eʼtirozlar gʻalayonlar va talon-torojlarga aylanib ketganidan soʻng koʻchalarni yonib ketgan mashinalar va singan oynalar egalladi
Namoyishlar va gʻalayonlar kunidan soʻng Frantsiya yakshanba tongida keng koʻlamli vayrongarchiliklar manzarasiga uygʻondi: dokonlarning oynalari sindirilgan, mashinalar yonib ketgan, velosipedlar kulga aylangan, Parij trotuarlari boʻylab oyna parchalari va chiqindi uyumlari sochilib yotibdi.
Shanba kuni politsiya 1800 ga yaqin kishini qoʻlga oldi, oʻsha kuni 550 000 ga yaqin namoyishchilar asosan tinch oʻtgan eʼtirozlarda yurish qildi.
Ular yonilgʻi narxining oshishi, yashash qiymati va davlat xizmatlari, jumladan, maktablar ahvoli yomonlashayotganiga qarshi eʼtiroz bildirayotgan edi.
Parij, Marsel va boshqa shaharlarda baʼzilari qora kiyim va niqob yoki balaklava kiygan gʻalayonchilar guruhlari paydo boʻldi, ularning baʼzilari mashinalar va binolarga oʻt qoʻydi.
Parij, Marsel va Lill, shuningdek, boshqa hududlarda keng koʻlamli talonchiliklar haqida xabar berildi.
Parijda eʼtirozchilar tartibsizliklarga qarshi politsiya kuchlari bilan toʻqnashdi, politsiya olomonga qarshi koʻzdan yosh oqizuvchi gaz va suv purkagichlardan foydalandi. Kun davomida baʼzi guruhlar koʻchada oʻt yoqdi va transport vositalarini yoqib yubordi. Kamida bitta restoran yogʻin-sochin ichida yonib kul boʻldi va BBC baʼzi guruhlar oʻrtasida mushtashuvlar kelib chiqqanini koʻrdi.
Parij markazida politsiyaning olomonga tashlangani va bir necha kishini dubinkalar bilan urgani koʻringan.
Janubda, Marselda eʼtirozchilar metall panjaradan foydalanib, shahar meriyasiga yorib kirdilar. Lill shahrida politsiyaning maʼlum qilishicha, McDonalds'ga oʻt qoʻyilgan, shahardagi Apple doʻkoniga esa yorib kirilib, talon-toroj qilingan.
Bosh vazir Sebastyan Lekornyu tartibsizliklarda 150 nafar politsiya xodimi jarohat olganini aytdi.
Yakshanba tongida Parijda aholi yetkazilgan zararni koʻzdan kechirdi, jumladan, Ralph Lauren, Gucci va Versace kabi dizaynerlik doʻkonlarining oynavand old qismlari sindirib tashlangan.
Doʻkon egalari tozalash ishlarini boshlab, supurgilar bilan ertalabdan katta oyna parchalarini yigʻib olishdi. Baʼzi katta koʻchalar boʻylab chiqindilarni olib tashlash uchun chiqindi tashuvchi mashinalar harakatlandi.
Koʻplab doʻkonlarga graffiti chizilgan, jumladan, "boylarga soliq solinsin" va "boylarni yeng" kabi shiorlar yozilgan.
BBC Respublika maydoni yaqinidagi kiyim-kechak doʻkoniga tashrif buyurdi, u talon-toroj qilingan, doʻkon poliga kiyim-kechak va mebellar sochilib yotgan edi.
Doʻkonning tushkunlikka tushgan egasi BBC’ga videokuzatuv kamerasida talonchilarni koʻrganini, ular doʻkon ichida bir yarim soatdan ortiq vaqt davomida boʻlishganini va bu vaqt ichida hech qanday politsiyani koʻrmaganini aytdi.
Oʻz shaxsi oshkor etilmasligini soʻragan doʻkon egasi BBC’ga doʻkonni talon-toroj qilganlarning hech biri maktablardagi sharoit yoki yashash qiymati boʻyicha haqiqiy eʼtirozchilar ekaniga ishonmasligini aytdi. Uning aytishicha, talonchilar namoyishlardan oʻz manfaatlari yoʻlida foydalanishgan.
Frantsiyaning Channel 2 kanalida koʻrsatilgan videokuzatuv kadrida asosan niqob taqqan oʻsmirlar guruhi mobil telefonlar doʻkonida tokchalardan buyumlarni olayotgani aks etgan.
Frantsiyada talabalar eʼtirozlari oʻtgan oyning oxirida boshlanganidan beri yuz minglab odamlarni koʻchalarga olib chiqdi. Eʼtirozchilar maktablarga koʻproq investitsiya kiritilishini talab qilib, oʻqituvchilar va xodimlarning yetishmasligi, sinfxonalarning haddan tashqari tigʻizligi va binolarning yaroqsiz ahvolini tanqid qilishmoqda.
Lionda mer Gregori Duse shahar turizm ofisining yonib ketishini "fojia" deb atadi va Frantsiyaning BFMTV telekanaliga "bu yuragimizni ogʻritadi, chunki bu juda ramziy, mashhur tarixiy bino" ekanini aytdi.
Mahalliy politsiyaning maʼlum qilishicha, "dushmanona kayfiyatdagi shaxslar" oʻt oʻchiruvchilarga yongʻinni xavfsiz oʻchirishga xalaqit bergan.
Oʻt oʻchirish guruhlari, shuningdem, Limoj shahar meriyasidagi yongʻin bilan ham kurashdilar, bu binoning bir qismi oʻpirilib tushishiga olib keldi. Mahalliy rasmiylar shahar meriyasi "asosan boy berilganini" aytishdi.
"Yavvoyi toʻda" 143 yoshli binoga "qasddan" oʻt qoʻydi, dedi Verxnyaya Vyenna departamenti prefekti Moris Barat.
Boshqa bir joyda, Janubiy-Sharqiy Sent-Etyen shahri meri Rejis Juaniko sotsial tarmoqda maʼlum qilishicha, kichik portlovchi modda tufayli bir yosh yigitning "qoʻli uzilib ketgan".
"Bunday fojia hech qachon yuz bermasligi kerak edi", dedi u.
Frantsiya Ichki ishlar vazirligining maʼlum qilishicha, shanba kungi eʼtirozlarda poytaxtning baʼzi qismlari, shuningdek, Marsel, Renn, Tuluza va gʻarbiy Anje shahri kabi joylarda "niqobli shaxslar" tomonidan "maqsadli zoʻravonlik harakatlari" sodir etilgan.
Butun Frantsiya boʻylab, jumladan, Grenobl, Avinon, Po, Monpelye va Valansda binolarga zarar yetkazilgani haqida xabar berildi.