Paramount $110 milliardlik Gollivud birlashuvida Warner Bros kompaniyasini sotib oldi

Paramount kompaniyasi Warner Bros Discovery ustidan nazoratni qoʻlga kiritish jarayonini 110 milliard dollarlik birlashish kelishuvi bilan yakunladi. Bu kelishuv Gollivud va keng qamrovli media sohasini tubdan oʻzgartirishi kutilmoqda.

Los-Anjelesdagi ikki eng yirik studiyani birlashtirgan ushbu kelishuv bir necha oylik huquqiy kurashlar hamda kutilayotgan qisqartirishlar va birlashish raqobatga hamda isteʼmolchilarga zarar yetkazishi mumkinligi haqidagi keng tanqidlardan soʻng amalga oshdi.

Bu kelishuv millionlab odamlar uchun striming tizimini oʻzgartirishi, kino va televideniye uchun yangi davrni boshlab berishi hamda AQShdagi eng yirik yangiliklar tarmoqlaridan biri boʻlgan CNN’ni noaniq vaziyatda qoldirishi kutilmoqda.

Бирлашиш, шунингдек, HBO, CBS, Nickelodeon, Showtime, Comedy Central, DC Studios ва Food Network каби кенг қамровли бизнесларни бирлаштиради.

Paramount kompaniyasi «Garri Potter» (Harry Potter), «Taxtlar oʻyini» (Game of Thrones), «Uzuklar hukmdori» (The Lord of the Rings) va «Uddalab boʻlmas topshiriq» (Mission: Impossible) kabi yirik franshizalar ustidan nazoratni qoʻlga kiritadi.

Yangi birlashgan koʻngilochar gigant Skydance Corporation deb qayta nomlanadi. Bu kompaniya dastlab Devid Ellison tomonidan, u Paramount va Warner Bros Discovery kompaniyalarini sotib olishidan oldin tashkil etilgan edi.

Ellison har ikki studiyaning merosini saqlab qolmoqchi ekanligini aytdi.

«Biz hech qachon yangi korporativ nom ularning birortasini kamsitishi, oʻzgartirishi yoki soyada qoldirishini istamaganmiz», — deb yozdi u ijtimoiy tarmoqlarda. «Buning oʻrniga, biz birlashgan kompaniyaga oʻz shaxsiyatini beradigan, shu bilan birga Paramount va Warner Bros — hamda bizning barcha favqulodda brendlarimiz — eʼtibor markazida qolishiga imkon beradigan nomni xohladik».

Ushbu sotib olish jarayoni boshidanoq bahs-munozaralarga boy boʻldi.

Dastlab Netflix kompaniyasi Warner Bros Discovery’ning bir qismini sotib olish boʻyicha kelishuvga ega edi, biroq Paramount Skydance raqobatli kurashni boshlab yubordi va bu striming gigantining chekinishiga olib keldi.

Shundan soʻng, AQShning oʻndan ortiq shtatlari advokatlari, Kaliforniya boshchiligida, ushbu kelishuv raqobatni boʻgʻishi, isteʼmolchilar uchun narxlarni oshirishi hamda kinoteatrlar, kabel distribyutorlari va «yakunda butun mamlakat boʻylab tomoshabinlar»ga «jiddiy» zarar yetkazishini daʼvo qilib, kelishuvni toʻsish maqsadida daʼvo arizalari kiritishdi.

Oʻtgan oyda AQSh shtatlari Paramount va Ellison bilan kelishuvga erishilganini eʼlon qilib, birlashishga yoʻl ochib berishdi.

Kelishuvga koʻra, Paramount kompaniyasi CNN va CBS telekanallarida «mustaqil, xolis va faktlarga asoslangan reportajlarni taʼminlash» uchun «yangiliklar tahririyatining mustaqillik kengashi»ni tuzish majburiyatini oldi.

Siyosat va tahririyat mustaqilligi masalasi CBS telekanalida 2025 yilda Skydance Media va Paramount oʻrtasidagi alohida birlashish doirasida ushbu koʻrsatuv beruvchi sotib olinganidan beri kuchayib borayotgan xavotirga aylangan edi.

Joriy yil boshida Prezident Donald Tramp uchun kechki ovqat tashkil qilgan Ellison tanqidchilarni tahririyat mustaqilligi saqlanib qolishiga ishontirishga harakat qildi.

Oʻzining 103 yillik tarixi davomida Warner Bros 100 dan ortiq «Oskar» mukofotini qoʻlga kiritgan, jumladan, oʻtgan yilgi marosimda «One Battle After Another», «Sinners» va «Weapons» filmlari uchun rekord darajadagi 11 ta «Oskar» bilan ustunlik qilgan edi.

Paramount tarixi 1912 yilga borib taqaladi va u ham «Choʻqintirgan ota» (The Godfather) dan tortib «Titanik» (Titanic) gacha boʻlgan klassik asarlar uchun 100 dan ortiq «Oskar»ga ega, garchi studiya soʻnggi paytlarda Gollivud mukofotlarida xuddi shunday muvaffaqiyatga erisha olmagan boʻlsa-da.

Oʻtgan yili studiya birorta loyihasi uchun «Oskar» nominatsiyasini ololmadi. Uning eng soʻnggi gʻalabasi 2022 yilda «Top Gun: Maverick» filmi bilan qoʻlga kiritilgan edi.

AQSh shtatlari bilan tuzilgan kelishuv birlashgan studiyalarning iqtisodiy faollikni yuzaga keltiradigan va odamlarni ish bilan taʼminlaydigan «haqiqiy, kuchli filmlar» ishlab chiqarishini taʼminlashga qaratilgan, dedi daʼvo va kelishuvga boshchilik qilgan Kaliforniya Bosh prokurori Rob Bonta.

Studiyaning yillik rejasini kam byudjetli yoki avtomatlashtirilgan materiallar bilan bajarishini oldini olish uchun kelishuv «sunʼiy intellekt tomonidan yaratilgan» filmlarga qarshi qatʼiy himoya choralarini oʻz ichiga oladi.

Kelishuvning bir qismi sifatida Paramount yiliga kamida 30 ta film chiqarishi kerak. Agar u ushbu yillik ishlab chiqarish kvotasini bajarmasa, obroʻsizlangan Gollivud magnati Xarvi Vaynshteyn va uning akasi Bob tomonidan asos solingan Miramax kinokompaniyasidagi 49 foizlik ulushini sotishiga toʻgʻri keladi.

Paramount, shuningdek, dastlabki ikki yil davomida barcha filmlar ishlab chiqarishning 20 foizi AQShda amalga oshirilishini taʼminlashi kerak, bu koʻrsatkich keyingi uch yil ichida 30 foizdan oshadi.