Panamada bir qator kuchli zilzilalardan soʻng binolar va yoʻllar oʻpirilib tushdi. Video
Panamada bir qator kuchli yer silkinishlaridan soʻng binolar va yoʻllar oʻpirilib tushdi. Video
Panama janubida 7,7 va 6,6 magnitudali ikkita kuchli yer silkinishi yuz berdi, shundan soʻng oʻnlab takroriy silkinishlar kuzatildi. Yer osti zarbalari binolar va yoʻllarga zarar yetkazdi, bir necha kishi jarohat oldi, hokimiyat organlari esa bir qator rayonlar aholisini vaqtincha evakuatsiya qildi.
Hokimiyat organlarining juma, 9 oktyabr kechki holatiga koʻra bergan maʼlumotlariga koʻra, halok boʻlganlar yoʻq. Birinchi yer silkinishi Errera provintsiyasidagi Pitalosa-Arriba aholi punktidan taxminan 10 kilometr janubi-gʻarbda yuz berdi. Ochogʻi taxminan 10 kilometr chuqurlikda joylashgan. Silkinishlar, jumladan, poytaxt Panama-Sitida va qoʻshni Kolumbiyada ham sezilgan.
Associated Press agentligining mahalliy hokimiyat organlariga tayanib xabar qilishicha, Panama universiteti seysmologlari 45 dan ortiq takroriy silkinishlar — aftershoklarni qayd etgan. Ularning baʼzilari 5,8, 5,5 va 5,2 magnitudaga yetgan.
Eng jiddiy vayrongarchiliklar markaziy Veraguas, Errera va Los-Santos provintsiyalarida qayd etilgan. Penonome shahrida bino qisman oʻpirilib tushdi, bir kishi esa qulagan parchalar tufayli jarohat oldi. Shunga oʻxshash zararlar gubernator maʼmuriyati binosida, Dos Continentes mehmonxonasida va mahalliy soborda ham aniqlandi, u yerda qoʻngʻiroqxona qisman oʻpirilib tushgan. Los-Santos provintsiyasida, mahalliy OAV xabarlariga koʻra, tarixiy San-Atanasio cherkovi oʻpirilib tushgan. Baʼzi yoʻllarda chuqur yoriqlar paydo boʻlgan.
Poytaxtda jiddiy zararlar qayd etilmadi. Tokumen xalqaro aeroporti birinchi yer silkinishidan soʻng oʻz ishini vaqtincha toʻxtatib turdi, ammo keyinchalik reyslarga xizmat koʻrsatishni qayta tikladi. Panama kanali shtat reajimida ishlashni davom ettirdi.
Yer osti silkinishlaridan soʻng hokimiyat organlari Panama, Kolumbiya, Ekvador, Nikaragua va Gvatemala qirgʻoqlari, shuningdek Chiliga tegishli boʻlgan Pasxa oroli uchun tsunami xavfi haqida ogohlantirish chiqardi. Keyinchalik ogohlantirishlar bekor qilindi. Panama Universiteti mutaxassislarining baholashicha, balandligi birdan uch metrgacha boʻlgan toʻlqinlar Isla-Kanyas oroli yaqinida va Los-Santos provintsiyasining janubiy qirgʻoqlarida yuzaga kelishi mumkin edi. Dengiz suvi Isla-Kanyas qirgʻogʻidagi baʼzi uylarga yetib borgani xabar qilindi.
Panama Prezidenti Xose Raul Mulino aholini xotirjamlikni saqlashga chaqirdi va yangi maʼlumotlar kelib tushishiga qarab oqibatlarni baholash oʻzgarishi mumkinligidan ogohlantirdi. AQSh va bir qator Lotin Amerikasi mamlakatlari yordam koʻrsatishga tayyorligini bildirdi.
Panama Tinch okeani olovli halqasida — yuqori seysmik va vulkanik faollik zonasida joylashgan. Bu yerdagi kuchli yer silkinishlari bir nechta tektonik plitalarning oʻzaro taʼsiri bilan bogʻliq.
, avgust oyida Tokio hududida 5,9 magnitudali yer silkinishi yuz bergan edi, buning oqibatida 37 kishi jabrlandi, ulardan biri ogʻir jarohat oldi. Yer osti silkinishlari infratuzilmaga zarar yetkazdi va poyezlar harakatini izdan chiqardi.