Oʻzbekistonda xavfli chiqindilarni sement pechlarida qayta ishlash taklif qilinmoqda – loyiha qiymati 3,9 mln yevro
FAO maʼlumotlariga koʻra, Oʻzbekistonda xavfli chiqindilarni yoʻq qilish imkoniyatlari cheklangani atrof-muhit va aholi salomatligi uchun xavf tugʻdiradi. Shu sababli xalqaro tashkilotlar xavfli chiqindilarni sement pechlarida qayta ishlashni taklif qilmoqda. Loyiha Yevropa Ittifoqi tomonidan moliyalashtiriladi va uning umumiy qiymati 3,9 mln yevroni tashkil etadi.
Oʻzbekistonda xavfli chiqindilarni sement pechlarida qayta ishlash taklif etilmoqda — loyiha qiymati 3,9 mln yevro
BMTning Oziq-ovqat va qishloq xoʻjaligi tashkiloti (FAO) hamda Chiqindilarni boshqarish va sirkulyar iqtisodiyotni rivojlantirish agentligi Toshkentda xavfli chiqindilarni ekologik jihatdan maqbul boshqarish masalasiga bagʻishlangan davra suhbatini tashkil etdi.
Tadbirda xalqaro tashkilotlar, rivojlanish hamkorlari, davlat idoralari, Oʻzbekiston sement ishlab chiqaruvchilar uyushmasi va sement zavodlari vakillari ishtirok etdi — unda ayrim turdagi xavfli chiqindilarni sement ishlab chiqarish jarayonida muqobil yoqilgʻi va xomashyo sifatida birgalikda qayta ishlash imkoniyatlari muhokama qilindi.
Sement pechlarida chiqindilarni birgalikda qayta ishlash (co-processing) ayrim mamlakatlarda xavfli chiqindilarni boshqarish usullaridan biri sifatida qoʻllanadi. Bunda chiqindilar sement ishlab chiqarish jarayonida yoqilgʻi yoki xomashyoning muqobili sifatida ishlatilishi mumkin.
FAO maʼlumotlariga koʻra, Oʻzbekistonda xavfli chiqindilarni yoʻq qilish imkoniyatlarining cheklangani atrof-muhit va aholi salomatligi uchun xavf tugʻdiradi. Shu sababli sement sanoatining ushbu yoʻnalishdagi salohiyatini oʻrganish masalasi kun tartibiga chiqarilgan.
Davra suhbatida FAO koʻmagida Ozarboyjonda doimiy organik ifloslantiruvchi moddalarni oʻz ichiga olgan pestitsid chiqindilarini nazorat ostida birgalikda qayta ishlash boʻyicha oʻtkazilgan sinov tajribasi ham taqdim etildi.
Shuningdek, Oʻzbekiston sement ishlab chiqaruvchilar uyushmasining chiqindilarni birgalikda qayta ishlashga biznes va investitsiya qarori sifatida yondashuvi muhokama qilindi.
Tadbir yakunida pilot loyihalarni amalga oshirish uchun hal qilinishi lozim boʻlgan dastlabki tartibga solish, ruxsat berish, infratuzilma va investitsiya masalalari belgilab olindi.
Yevropa Ittifoqining Oʻzbekistondagi delegatsiyasi dastur menejeri Roberto Aparisioning taʼkidlashicha, keyingi bosqichda muhokamalarni davlat idoralari va sanoat vakillari bilan kelishilgan yoʻl xaritasiga aylantirish muhim.