Oʻzbekistonda issiqlik taʼminoti tariflari har yili 10% atrofida oshirilishi mumkin

Oʻzbekistonda issiqlik taʼminoti tariflari har yili 10% atrofida oshirilishi mumkin

Oʻzbekistonda 2028 yildan boshlab markazlashtirilgan issiqlik taʼminoti tariflarini inflyatsiyani hisobga olgan holda har yili oshirish taklif etilmoqda. Bu Qurilish va uy-joy kommunal xoʻjaligi vazirligi muhokama uchun eʼlon qilgan hukumat qarori loyihasida nazarda tutilgan.

Loyihaga koʻra, tariflar yiliga bir marta — 1 maydan — yillik inflyatsiyani hisobga olgan holda, lekin 10% dan koʻp boʻlmagan miqdorda indeksatsiya qilinadi.

Qurilish va uy-joy kommunal xoʻjaligi vazirligi hamda Iqtisodiyot va moliya vazirligining takliflari indeksatsiya uchun asos boʻladi.

Eslatib oʻtamiz, prezidentning 2025 yil 11 martdagi qarorida aholi uchun issiqlik taʼminoti boʻyicha pasaytirilgan tariflarni 2030 yilga borib xizmatlar tannarxi darajasiga bosqichma-bosqich yetkazish nazarda tutilgan.

Bunda yangi loyihada 2026 yil 1 noyabrdan issiqlik va issiq suv tariflarini alohida oshirish nazarda tutilgan. Xususan, Toshkent shahrida ushbu xizmatlar qiymatini taxminan 30% ga oshirish taklif etilmoqda.

Loyihada, shuningdek, issiqlik yuklamasi va issiqlik energiyasi isteʼmoli normativlarini qayta koʻrib chiqish ham nazarda tutilgan.

«Issiqliktaʼminoti» AJ, uning tarkibiga kiruvchi korxonalar, shuningdek, davlat-xususiy sheriklik asosida markazlashtirilgan issiqlik taʼminoti xizmatlarini koʻrsatuvchi tashkilotlar ikki oy muddatda amaldagi normativlarni shaharsozlik normalari va qoidalariga muvofiq qayta koʻrib chiqishlari kerak boʻladi.

Yangilangan koʻrsatkichlarni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga tasdiqlash uchun kiritish zarur.

Bunda hujjat bilan quyidagi tartibni belgilash taklif etilmoqda:

Loyihaning alohida blogi issiqlik energiyasini ishlab chiqarish va yetkazib berish xarajatlarini kamaytirishga bagʻishlangan.

Qurilish va uy-joy kommunal xoʻjaligi vazirligi Energiya samaradorligi milliy agentligi, Energetika vazirligi, «Issiqliktaʼminoti» AJ va boshqa idoralar bilan birgalikda bir oy muddatda issiqlik energiyasi tannarxini 15% gacha kamaytirish boʻyicha chora-tadbirlar dasturini ishlab chiqishi kerak.

Bundan tashqari, 2027 yil oxirigacha mamlakat issiqlik taʼminoti tizimlarini toʻliq texnik auditdan oʻtkazish rejalashtirilmoqda.

Uning natijalari boʻyicha issiqlik tarmoqlari va boshqa issiqlik taʼminoti obʼyektlarini modernizatsiya qilish va qayta qurish dasturi ishlab chiqilishi kerak. Hujjat tasdiqlash uchun Vazirlar Mahkamasiga yuboriladi.

Ijtimoiy va ishlab chiqarish infratuzilmasini rivojlantirish dasturlarini shakllantirishda texnik auditdan oʻtgan obʼyektlarni kiritish nazarda tutilmoqda.

Loyihada «Issiqliktaʼminoti» AJ korporativ boshqaruviga oʻzgartirishlar kiritish nazarda tutilgan. Xususan, bir oy muddatda kompaniya kuzatuv kengashining mustaqil aʼzolari ulushini 75% ga yetkazish taklif etilmoqda.

2026 yil oxirigacha ikkita lavozimga — raisning moliyaviy masalalar boʻyicha oʻrinbosari va raisning texnik masalalar boʻyicha maslahatchisi lavozimlariga malakali xorijiy mutaxassislarni jalb etish rejalashtirilmoqda.

2027 yil 1 aprelgacha kompaniyaning ijroiya organi uchun 2027 yil yakunlari boʻyicha issiqlik tarmoqlaridagi yoʻqotishlarni 25% ga kamaytirishni nazarda tutuvchi samaradorlikning muhim koʻrsatkichlari (KPI) joriy etilishi kerak.

Shuningdek, 2026 yil oxirigacha «Issiqliktaʼminoti» AJ tarkibidagi issiqlik taʼminoti korxonalari zamonaviy billing tizimi bilan qamrab olinishi kerak.

2027 yil 1 aprelgacha kompaniya 2026 yil uchun moliyaviy hisobotdan boshlab, xalqaro standartlar boʻyicha moliyaviy hisobotni tayyorlashga oʻtishi kerak.

Qurilish va uy-joy kommunal xoʻjaligi vazirligi, Iqtisodiyot va moliya vazirligi, Energiya samaradorligi milliy agentligi, Energetika vazirligi va «Issiqliktaʼminoti» AJ xalqaro konsultantlar bilan birgalikda 2027 yil 1 maygacha issiqlik taʼminoti sohasini 2030 yilgacha rivojlantirish strategik dasturini ishlab chiqishlari kerak boʻladi.

Eslatib oʻtamiz, 2026 yildan boshlab Oʻzbekistonda elektr energiyasi va gaz tariflari inflyatsiyani hisobga olgan holda, lekin 10% dan koʻp boʻlmagan miqdorda har yili 1 maydan oshirila boshlandi.