Oʻzbekistonda 3 yoshdan 18 yoshgacha boʻlgan bolalar uchun milliy tarbiya modeli ishlab chiqilmoqda
Oʻzbekistonda 3 yoshdan 18 yoshgacha boʻlgan bolalar uchun uzluksiz Milliy tarbiya modeli ustida ish olib borilmoqda, undan koʻzlangan maqsad maktabgacha, umumiy oʻrta, professional va oliy taʼlim tizimidagi tarbiya jarayonlarini oʻzaro bogʻlashdan iborat.
Ushbu model Toshkent shahrining Olmazor tumanidagi 441-sonli davlat maktabgacha taʼlim tashkilotida boʻlib oʻtgan «Maktabgacha taʼlimda Milliy tarbiya modeli: kelajak avlodni tarbiyalashning strategik yoʻnalishi» mavzusidagi amaliy seminarda koʻrib chiqildi. Tadbirda senatorlar, Maktabgacha va maktab taʼlimi vazirligi hamda uning hududiy va tuman boʻlimlari masʼullari, shuningdek, taʼlim sohasi vakillari ishtirok etdilar.
Yigʻilganlar taʼlim va tarbiya sohasidagi joriy islohotlarni, jumladan, bolalar qalbiga milliy va umuminsoniy qadriyatlarni singdirish hamda maktabgacha taʼlimdan boshlab uzluksiz milliy tarbiya tizimini yaratish borasidagi ishlarni muhokama qildilar. Senat Raisi Tanzila Narbayeva oʻz kirish soʻzida Oʻzbekistonda taʼlim olish imkoniyatlari kengayganini, endilikda asosiy eʼtiborni taʼlim va tarbiya sifatini oshirishga qaratish lozimligini taʼkidladi.
Milliy tarbiya modeli alohida tarbiyaviy tadbirlar majmui sifatida emas, balki yagona, uzluksiz tizim sifatida ishlashi koʻzda tutilgan. U maktabgacha taʼlimdan boshlab umumiy oʻrta, professional va oliy taʼlimgacha boʻlgan barcha bosqichlarni qamrab olishi kutilmoqda. Uning ustuvor yoʻnalishlari qatoriga milliy oʻzlikni anglash va vatanga sadoqat, maʼnaviy-axloqiy fazilatlar, halollik va inson qadr-qimmatini hurmat qilish tuygʻularini shakllantirish kiradi.
Shuningdek, u zoʻravonlikka nisbatan murosasizlik, oilaviy qadriyatlar, sogʻlom turmush tarzi, huquqiy madaniyat, mustaqil fikrlash, mehnatsevarlik, fuqarolik faolligi hamda tabiat va atrof-muhitga masʼuliyat bilan yondashishni oʻz ichiga oladi. Ishtirokchilarning taʼkidlashicha, tarbiyaning samaradorligi oʻtkazilgan tadbirlar yoki tayyorlangan hisobotlar soni bilan emas, balki bolalarning xulq-atvori, dunyoqarashi va amaliy hayotiy koʻnikmalaridagi oʻzgarishlar bilan baholanishi lozim.
Maktabgacha va maktab taʼlimi vaziri H. Karimova uzluksiz Milliy tarbiya modelining asosiy tarkibiy qismlari va strategik maqsadlarini bayon qildi. 3 yoshdan 18 yoshgacha boʻlgan bolalarni qamrab oluvchi ushbu tashabbus «Vatanparvar, millatiga sodiq, bilimli, tartib-intizomli, tashabbuskor va Vatan taqdiriga daxldor avlodni tarbiyalash» shiori ostida ishlab chiqilmoqda.
Maktabgacha va maktab taʼlimi vazirligi tomonidan tashkil etilgan maxsus ishchi guruh Senat muvofiqlashtiruvida loyihani tayyorlamoqda. Seminarda ushbu modelni taʼlim muassasalariga joriy etishga koʻriladigan tayyorgarlik ishlari ham muhokama qilindi. Ishtirokchilar pedagoglarni tayyorlash va qoʻllab-quvvatlash, ularni zamonaviy oʻqitish uslublari va milliy taʼlim mazmuni bilan taʼminlash, shuningdek, ota-onalar, mahalla va keng jamoatchilik bilan hamkorlikni kuchaytirish muhimligini taʼkidladilar.
Tadbir doirasida ishtirokchilar 441-sonli davlat maktabgacha taʼlim tashkilotining yangi qurilgan binolari bilan tanishdilar. Seminarda, shuningdek, oʻzbek tilini oʻyin usullari orqali oʻrgatuvchi «Oʻzbek tilini oʻyin orqali oʻrganamiz» platformasining taqdimoti oʻtkazildi.